DILI, 11 Agostu 2025 (TATOLI)—Ministru Obra Públika (MOP), Samuel Marçal, hateten kuaze ema barak mak kestiona kona-ba kualidade estrada iha Dili laran, maibé atu deteta kualidade bazeia ba teste laboratóriu la’ós haree de’it dehan la kualidade ona.
Notísia Relevante: Montana Diak nahe ona alkatraun ba estrada iha Bidau to’o Kuluhun
“Mezmu ha’u servisu iha infraestrutura ne’e, iha tinan ne’e halo tinan 10 resin ona, maibé ha’u rasik labele ko’alia estrada ida laiha kualidade. Tanba, atu dehan kualidade ka la kualidade ne’e, la’ós depende ba ida-idak nia haree maibé depende ba rezultadu husi teste laboratóriu,” Ministru ne’e hateten ba jornalista sira iha Ministériu Finansa, Aitarak Laran, foin lalais ne’e.
Governante ne’e hatutan, bainhira dehan estrada la kualidade ne’e tenke halo teste lai, Estrada ne’e tohar no naksobu ne’e mak laiha kualidade, la’ós ema foin mak ke’e fatuk ida dehan estrada laiha kualidade ona.
“Iha ne’ebé mak Estadu hakarak halo buat ne’ebé laiha kualidade. Ema hotu-hotu halo sasán ne’e halo ho kualidade. Aleinde ne’e, ita mós iha enjeñeiru no asesór barak-barak para asegura nia kualidade,” nia dehan.
Tanba konstrusaun ne’e halo dezenvolvimentu ba povu hodi uza ho tempu ne’ebé mak naruk, no sira mós iha prinsípiu katak bainhira kompañia ida-ne’ebé halo konstrusaun laiha kualidade entaun Ministériu Obra Públika (MOP) iha kompeténsia atu sobu.
Jornalista : Alexandra da Costa
Editór : Cancio Ximenes
