Parlamentu TL halo esforsu diplomátiku hodi fortalese relasaun ho Tailándia
DILI, 11 Agostu 2025 (TATOLI) – Komisaun B Parlamentu Nasionál ne’ebé trata Asuntu Negósiu Estranjeiru, Defeza ho Seguransa halo ona vizita traballu ba Embaixada Timor-Leste (TL) iha Tailándia, hodi avalia kondisaun atuál serbisu diplomátika no dezenvolve rekomendasaun atu reforsa relasaun bilaterál no adezaun país nian ba Asosiasaun Nasaun Sudeste Aziátiku (ASEAN, iha inglés).
Deputadu Komisaun B, Natalino dos Santos, dehan vizita iha tempu resesu parlamentár nian fó oportunidade ba Komisaun atu avalia ezekuasaun Orsamentu Jerál Estadu (OJE) 2025 iha embaixada nian no haree kondisaun serbisu misaun diplomátika nian atu toma atensaun iha proposta OJE 2026.
Nia dehan nesesidade duni atu reforsa kapasidade no kondisaun serbisu iha embaixada, tanba espasu ne’ebé ki’ik. “Presiza duni reforsa, tanba la kle’ur ita tama ASEAN, sei iha reuniaun barak no presiza aumenta adidu imigrasaun no komésiu, tanba provizóriu iha adidu ida de’it ba edukasaun”, nia salienta.
Komisaun sei hato’o relatóriu husi rezultadu vizita ne’e ba Governu liuhusi ministériu relevante hodi bele konsidera.
Deputadu Natalino informa mós kona-ba rezultadu serbisu diplomátiku nasaun nian iha Tailándia, ne’ebé kontribui ba kooperasaun ne’ebé forte entre país rua ne’e no Tailándia apoia maka’as Timor-Leste nian adezaun ba ASEAN.
“Liuhusi serbisu diplomátiku, Tailándia hakarak halo investimentu, liuliu setór privadu sira. Sira mós husu Timór bele lori kafé bá fa’an iha loja sira iha Tailándia”, nia hateten.
Iha vizita ne’e, delegasaun Parlamentu Timor-Leste halo mós enkontru ho lidér husi Parlamentu Tailándia hodi diskute reforsa relasaun entre parte rua, liuhusi Grupu Amizade entre país rua ne’ebé estabelese ona.
Durante sorumutu, Tailándia partilla esperiénsia kona-ba área investimentu hanesan agrikultura, peska, turizmu no ekonomia – setór importante ne’ebé fó benefísiu maka’as ba Tailándia.
Notísiarelevant: Parlamentu TL hakarak reforsa diplomasia parlamentár ho Tailándia
Jornalista: Nelson de Sousa
Editora: Maria Auxiliadora
