L7 kompromete sei instala sede kombatente iha kada postu
BAUKAU, 12 Agostu 2025 (TATOLI)–Prezidente Konsellu Munisipál Kombatente Libertasaun Nasionál (CMCLN-sigla portugeza) Baukau Eleitu, Cornélio da Conceição Gama ‘L7’ kompromete sei instala sede kombatente iha kada postu administrativu durante mandatu tinan-lima.
L7 esplika atu atinje prioridade referida sei akumula eis gerilleiru FALINTIL Baukau-oan hanesan Taur Matan Ruak, Beredu’u, Alin Laek no seluk tán nune’e hamutuk bele rezolve lista editál kombatente tinan-2009 nian ne’ebé maioria sei iha faze kontestasaun.
“Primeiru ita atu haree saudozu sira hanesan Vicente Reis ‘Sahe’ ne’ebé seidauk haloot no sede ba kada postu sira,” Prezidente CMCLN Baukau Eleitu hateten iha Sentru Konvensaun Baukau, Vila Antiga, Tersa ne’e.
Notísia relevante: Cornélio Gama ‘L7’ eleitu sai Prezidente CMCLN Baukau
L7 salienta instalasaun sede iha kada postu administrativu importante tanba bainhira estabelese sei bele rekolla ekipamentu funu no hakerek istória luta husi tinan-1975 to’o 1999 liuliu iha área Baukau nune’e jerasaun foun bele aprende.
Alende ne’e, eis gerileiru ne’e relata katak durante lidera CMCLN iha Baukau sei koordena ho Governu liuhosi Ministériu Asuntu Kombatente Libertasaun Nasionál (MAKLN) aselera hodi rezolve restu mortál Saudozu ‘Sahe’ ne’ebé sei asegura iha rezidénsia família iha Suku Bukoli, Postu Baukau Vila.
Eis Deputadu Parlamentu Nasionál (PN) ne’e husu veteranu sira atu nafatin kontribui ba prosesu dezenvolvimentu no kontinua serbisu hamutuk ho Governu no parte seguransa hanesan Polísia Nasionál Timor-Leste (PNTL) inklui FALINTIL-Forsa Defeza Timor-Leste (F-FDTL) hodi garante estabilidade iha Timor.
“Ha’u tenke akumula hotu veteranu Baukau nian halai hamutuk rezolve problema veteranu,” L7 promete.
Jornalista: Natalino Belo
Editór: Xisto Freitas da Piedade
