BOBONARU, 12 Agostu 2025 (TATOLI)—Negosiante sira ho konxiénsia sobu no muda hotu ona baraka ho kioske iha merkadu lokál Ilibole hodi hamamuk espasu publiku ne’ebé durante ne’e sira okupa ba atividade negósiu.
Negosiante husi Raifun, Eduardo Amarál Pires informa totál baraka 11 mak na’in sobu no muda fali ba kotuk hodi halo atividade negósiu provizóriu.
Notísia relevante: Negosiante balun ho konxiénsia sobu rasik ona baraka iha merkadu Ili-bole
“Ami sobu dezde fulan kotuk to’o ohin ita-boot sira haree baraka oan laiha ona, tanba Estadu dehan sobu ami sobu ona, labele ulun-to’os. Buat ne’e halo di’ak ba ita maibe Estadu mós tenke dudu halo luan fatin provizóriu iha kotuk ne’e. Se lae ema barak fatin la to’o,” nia informa ba jornalista TATOLI iha nia negósiu fatin, Tersa ne’e.
Aleinde ne’e, negosiante Feliciana Soares haktuir katak sira muda hotu ona sasán ba kotuk tanba notifikasaun ne’ebé Autoridade Munisípiu Bobonaru fó besik to’o ona prazu no iha tempu vizita Krúz Joven Internasionál sei liuhusi fatin ne’e.
Jornalista: Sergio da Cruz
Editór: Xisto Freitas da Piedade
