DILI, 12 Agostu 2025 (TATOLI) – Komisaun F iha Parlamentu Nasionál ba Asuntu Saúde, Igualdade Jéneru no Inkluzaun Sosiál, solisita ba Ministériu Interiór no Komandu Jerál Polísia Nasionál Timor-Leste (PNTL) atu iha rekrutamentu membru foun tenke tau prioridade kuota ba feto 30%.
Tuir observasaun Prezidente Komisaun F, Maria Gorumali Barreto, durante ne’e iha instituisaun PNTL komesa promove feto nia diviza, nune’e nia espera iha rekrutamentu ne’e tau prioridade mós ba feto.
“Ami rekomenda tau nafatin prioridade 30% ba kuota feto, ne’ebé partisipa iha prosesu rekrutamentu”, nia reitera.
Hodi salienta katak iha lei atuál no Estadu Timor-Leste rasik ratifika ona konvensaun CEDAW iha tinan 2002, inklui kongresu plataforma feto, katak promove partisipasaun feto hodi ezije nafatin kuota 30% ba feto asume nia pozisaun, nomós partisipa iha rekrutamentu iha setór hotu iha Timor-Leste.
“Ita hotu iha responsabilidade no devér oinsá promove feto iha nivel hotu-hotu”, nia salienta.
Lembra katak Komandu Polísia Nasionál Timor-Leste (PNTL) altera ona kritériu teste fíziku ba partisipasaun feto iha rekrutamentu PNTL ba tinan ne’e hodi hasa’e kuota husi pursentu 15 (ekivale ba ema na’in-80) ba pursentu 17.
PNTL mós fó sai ona informasaun kona-ba rekrutamentu ba membru polísia foun ho totál hamutuk 400, ba tinan 2025, ne’ebé hahú ona iha loron 05 to’o 29 Agostu foti formuláriu atu prienxe no sei submete fali iha 12 Agostu to’o 09 Setembru 2025.
Notísia relevante: Rekrutamentu ba membru PNTL foun hahú aban
Jornalista: Nelson de Sousa
Editora: Maria Auxiliadora
