Rekrutamentu ba membru PNTL foun hahú aban

DILI, 04 Agostu 2025 (TATOLI) – Polísia Nasionál Timor-Leste (PNTL) fó sai ofisialmente informasaun kona-ba rekrutamentu ba membru polísia foun ho totál hamutuk 400, ba tinan 2025, sei hahú iha loron 05 Agostu.

Segundu Komandante Jerál PNTL no Prezidente Juri ba Konkursu, Komisáriu Pedro Belo, informa ba joven sira ne’ebé iha interese atu kandidata an, hahú iha loron 05 to’o 29 Agostu, bele foti formuláriu atu prienxe no sei submete fali iha 12 Agostu to’o 09 Setembru 2025.

Pedro Belo dehan formuláriu ne’e foti iha Komandu Munisípiu sira hotu, inklui iha Rejiaun Administrativa Espesiál Oekusi Ambenu (RAEOA) no Ataúru. Iha Dili, foti formuláriu iha fatin rua mak iha Sentru Formasaun Polísia Komoro-Dili no Komandu Jerál Kaikoli.

“Ha’u husu ba joven sira ne’ebé hakarak kandidata an ba polísia tenke displina. Ami hatene katak ema barak sei bá forma iha Komandu Munisípiu Dili, maibé nafatin disiplina, tanba tempu sufisiente ba imi atu prienxe formuláriu”, Pedro Belo hateten iha Sentru Formasaun Polísia iha Komoro, ohin.

Iha fatin hanesan, Superintendente no Portavós Komisaun Rekrutamentu PNTL, António da Luz, hateten rekrutamentu ne’e bazeia ba diploma ministeriál númeru 17/2025, 25 Juñu, regulamentu ba konkursu admisaun públika ba kursu formasaun ba ajente Polísia Nasionál Timor-Leste.

Nia esplika katak kondisaun admisaun jerál ba kompetisaun hamutuk 12 mak hanesan – tenke sidadaun Timor-Leste nian; domina pelumenus lian ofisiál ida; sei solteiru; iha kualifikasaun akadémika mínimu 12.º anu ka ekivalente; idade entre 18 no 23 to’o loron 31 fulan-Dezembru tinan 2025; no aas mínimu metru 1,58 ba kandidatu feto no mane 1,65.

Aleinde ne’e, iha aptidaun fíziku no mentál rekoñesidu ba ezersísiu knaar Polísia nian; iha kualidade morál apropriadu no komportamentu síviku ne’ebé permite sira atu atua ho justisa, lealdade, integridade, onestidade, no kompeténsia profisionál, hodi hamosu konfiansa no respeitu husi populasaun no kontribui ba prestíjiu PNTL no instituisaun demokrátika sira.

La hetan ezonerasaun husi instituisaun seluk Estadu nian; la hetan kondenasaun tanba krime intensionál ruma; hatudu adekuasaun ba ezersísiu funsaun Polísia nian, ne’ebé karateriza ho la sai arguidu iha kualkér prosesu kriminál neʼebé la’o hela, nomós la sujeita ba medida koersivu, akuzasaun formál, ka julgamentu ba krime intensionál ho ofensa kriminál ne’ebé bele hetan kastigu liu tinan tolu iha prizaun; no disponivel ba knaar iha ne’ebé de’it iha territóriu nasionál, bainhira tuir no kompleta ho susesu CFA-PNTL, tuir nesesidade servisu PNTL nian.

Nia esplika mós kona-ba formuláriu aplikasaun ba kandidatura sira mak tenke hatama dokumentu sira hanesan fotografia kór ho fundu mean (dimensaun 3 X 4 cm) tahan rua; fotokópia Billete Identidade (BI) tahan ida; fotokópia Kartaun Rejistu Eleitór nian tahan ida; fotokópia Sertidaun Moris RDTL tahan ida; fotokópia Diploma Sekundária (Legaliza husi Ministériu Edukasaun) tahan ida; no sertidaun rejistu kriminál válidu durante fulan 6.

Ba kandidatu sira ne’ebé hetan ona julgamentu iha Tribunál, fotokópia husi desizaun tribunál nian; ba kandidatu sira ho prosesu legál iha tribunál dokumentu neʼebé prova estatutu prosesuál; deklarasaun husi xefe suku, asina husi administradór postu administrativu no komandante eskuadra; fotokópia fixa família nian tahan ida; deklarasaun husi Konsellu Kombatente Libertasaun Nasional; fotokópia kartaun identifikasaun pesoál no sertifikadu tama iha PNTL ba kandidatu sira ne’ebé inan-aman hanesan PNTL tahan ida.

Nia haktuir katak fatin submete dokumentu iha Komandu Munisípiu 12, RAEOA, Administrasaun Espesiál Ataúru no Sentru Formasaun Polísia (SFP) Komoro-Dili, ba kandidatu sira ne’ebe hela iha Dili (bazeia ba eleitorál no BI).

António da Luz subliña katak rekrutamentu ba ajentu foun ne’e laiha kritériu própriu ba sira ne’ebé tama iha arte marsiál sira, maibé bainhira sira liu ona, sei tuir formasaun no bainhira ramata, sei iha regulamentu própriu ba sira.

Ba sira ne’ebé tatuajen (tato isin) sei la permite hola parte iha prosesu ne’e. “Komisaun sei la permite rekomendasaun sira, hothotu sei tuir prosesu normál, tantu Polísia nia oan komu veteranu nia oan. Ne’ebé laiha diskrimisaun”, konklui.

Rekrutamentu daudaun ne’e foka uluk ba ajente sira no ba ofisiál sira seidauk iha.

Notísia relevante: MI orienta Komandu PNTL prepara kondisaun ba rekrutamentu membru foun

Jornalista: Arminda Fonseca

Editora: Maria Auxiliadora