DILI, 31 Jullu 2025 (TATOLI)-Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa, hateten simu ona orientasaun husi Ministru Interiór (MI) Francisco da Costa Guterres, atu prepara kondisaun nune’e rekrutamentu ba membru polísia foun bele hahú.
Komisariu Henrique hateten vaga rekrutamentu sei halo iha fulan-Agostu, konaba data fixu sei hein despasu husi ministru interiór.
“Ohin ha’u ho Segundu Komandante Jerál, Diretór Diresaun Servisu Investigasaun Kriminál Nasionál, hasoru eselénsia ministru hodi relata servisu balun ne’ebé mak komandu halo durante fulan ida-ne’e nia laran. Eselénsia ministru mós fó orientasaun ba komandu hala’o servisu liuliu preparasaun ba rekrutamentu ninian”, nia haktuir ba jornalista sira hafoin hasoru ministru iha Vilaverde, kinta-ne’e.
Nia hatutan tan: “Preparasaun sira ba rekrutamentu membru PNTL agora preparadu, daudaun ita hahú halo instalasaun ba sekretariadu juri no mós prepara fasilidade, nune’e hein de’it despasu husi sua-eselénsia bainhira mak atu anúnsia ofisialmente ba vaga ne’e”.
Komisáriu dehan bainhira ministru hatún ona despasu, automatikamente sekretariadu ne’ebé instala ba rekrutamentu mak sei anúnsia prosesu.
Henrique lakohi fundamenta barak kona-ba kestaun rekrutamentu ne’e liliu liga ba kriteriu. “Ita labele públika sai lai, bainhira ofisialmente deklara ona, Prezidente Juri mak sei ko’alia”.
Alende orientasaun preparasaun ba rekrutamentu, nia dehan ministru mós orienta atu polísia presta servisu ne’ebé di’ak liután, besik liu ba komunidade liuhusi atividade polisiamentu komunitáriu.
Notísia relevante: Rekrutamentu membru polísia foun hein desizaun husi Primeiru-Ministru
Jornalista : Natalino Costa
Editora : Rita Almeida
