SEFOPE apoia fasilidade eletróniku ba Sentru Juventude Kovalima
KOVALIMA, 12 Agostu 2025 (TATOLI)- Sekretáriu Estadu Formasaun Profesionál no Empregu (SEFOPE) munisípiu Kovalima, tersa-ne’e, apoiu fasilidade eletróniku ba Sentru Juventude munisipál Kovalima hodi fasilita sira hala’o formasaun ba joven sira.
“Ami apoiu komputadór ho marka HP hitu ho projetór ida ho baze ba pedidu ne’ebé mak Sentru Juventude Kovalima submete ba SEFOPE ba iha Diresaun Formasaun Profisionál Empregu ho nune’e mak ohin ita entrega fasilidade hirak ne’e ba sira”, Reprezentante Diretór SEFOPE, João Perreira hato’o ba Jornalista sira hafoin entrega Komputadór baSentru Juventude Kovalima iha kampung Baru-Kovalima, ohin.
SEFOPE apoia materiál eletróniku hodi sosa komputadór hitu ho projetór ida no sasan seluk tan nia orsamentu mai husi orsamentu Jerál Estadu (OJE) 2025 hamutuk $5.000.
Agradese ba SEFOPE
Iha biban hanesan, Diretór Ezekutivu Sentru Juventude Kovalima, Julio Ferreira, hato’o agradesimentu ba Governu liuhusi SEFOPE tanba apoia ona sentru ne’e, hodi fasilita atividade formasaun ba joven sira iha munisípiu referidu.
“Ami hato’o pedidu tanba joven sira hasoru difikuldade bainhira fó formasuan ba joven sira tanba laiha fasilidade, maibé ho apoia ida-ne’e bele apoia ona sentru ne’e nia atividade”, nia agradese.
Tuir dadus komputadór ne’ebé daudaun iha Sentru Juventude Kovalima hamutuk 10, maibé husi númeru ne’e komputadór rua aat ona, nune’e uza komputadór ualu.
Jornalista : Celestina Teles
Editór : Florencio Miranda Ximenes
