Tinan 50 reflete loron FALINTIL, estudante tenke sai kontinuadór
DILI, 12 Agostu 2025 (TATOLI)—Timor-Leste iha loron 20 Agostu 2025 komemora loron FALINTIL ba dala-50, nune’e estudante no juventude mak sai kontinuadór ba dezenvolvimentu nasaun ida-ne’e nian.
Tanba ne’e, Adjuntu Diretór Saúde Militár, Álferes Salvador do Santos, hateten, estudante tenke sai kontinuadór no banati saida mak eroi sira husik hela, iha ámbitu atu reflete tinan 50 loron FALINTIL.
“Estudante hatudu kontribuisaun ba dezenvolvimentu rai doben Timor-Leste hodi banati tuir eroi sira no tenke orgullu hanesan Timoroan, la signifika tenke Polísia, Forsa no Ministru sira maibé ita bele hatudu liuhusi ita-nia hahalok hodi hamenus problema, tanba espíritu nasionalizmu ne’e importante. Uluk eroi sira kaer espíritu nasionalidade, estudante tenke estuda maka’as, haraik-an no respeitu ema seluk tanba estudante mak kontinuasaun ba futuru nasaun ni’an,” Álferes Salvador hateten iha nia diskursu iha Eskola Ensinu Sekundáriu Jerál FINANTIL, Komoro, Tersa ne’e.
Notísia relevante : Komemorasaun loron FALINTIL tinan-ne’e hala’o iha Tasi-Tolu
Tanba ne’e, FALINTIL-Forsa Defeza Timor-Leste (F-FDTL) liuhusi Saúde militár hamutuk ho Ministeriu Edukasaun (ME), no Institutu Siénsia Saúde disemina informasaun ba estudante sira ho tema ‘ambiente no saúde reprodutiva’. Nune’e atu fahe informasaun ba estudante sira kona-ba ezisténsia FALINTIL.
“Ita mai iha ne’e ho objetivu atu fahe informasaun sira ba ita-nia alin estudante sira relasiona ho aniversáriu no ezisténsia FALINTIL ba dala-50, ne’ebé sei akontese iha loron 20 Agostu ne’e. Ida-ne’e atu ita hanoin hikas tinan osan mean ba eroi sira ne’ebé mak luta ba rai ida-ne’e, no fahe mós informasaun balun kona-ba saúde reprodutiva,” Adjuntu Diretór Saude Militar, akresenta.
Álferes Salvador, dehan, loron FALINTIL la’ós de’it ba F-FDTL sira maibé hanesan loron ne’ebé importante ba ema hotu no ba nasaun Timor-Leste.
Iha fatin hanesan, Diretór Nasionál Ensinu Rekorente iha Ministériu Edukasaun, Alfredo Fernandes, enkoraja estudante sira atu buka hatene istória sira ne’ebé importante kona-ba Timor-Leste nian inklui mós loron FALINTIL.
“Ita kontinua nafatin enkoraja estudante sira atu tau iha kakutak, kona-ba istória importante sira Timor nian, liuliu atu buka kompreende ba loron FALINTIL nian.
ME sei prepara estudante sira hodi partisipa másimu iha selebrasaun loron FALINTIL tanba nasaun ne’e atu la’o ba oin presiza joven sira-nia kolaborasaun, dezempeñu, dedikasaun no kontribuisaun.
“La kleur tan ita selebra aniversáriu Finantil ba dala-50, loron ne’e importante no festa osan-mean, nune’e ita sei prepara estudante sira hodi hola parte másimu iha loron importante ne’e,” nia katak.
Dirijente ne’e mós afirma, iha loron 20 Agostu sei halo long mars ida husi Rotunda Nicolau Lobato bá Tasi-Tolu ne’ebé mak sei hola parte husi estudante sira hotu.
Nune’e mós, Diretór Eskola Ensinu Sekundáriu Jerál FINANTIL, Aniceto Berlelo, sente previleju no orgullu tebes tanba eskola FINANTIL mak hahú uluk ho semináriu ba selebrasaun loron FALINTIL 50 nian.
“Estudante sira tenke valoriza loron ne’ebé la kleura tan ita atu selebra iha 20 Agostu ne’e. Tanba loron ne’ebé mak importante ba rai ida-ne’e tenke respeitu ita-nia eroi sira-nia mate,” nia tenik.
Jornalista : Osória Marques
Editora : Julia Chatarina
