Youth Vision Center oferese formasaun otelária ba joven Vikeke
VIKEKE, 12 Agostu 2025 (TATOLI)—Organizasaun Naun Governamentál Youth Vision Center ne’ebé apoiu husi Sekretaria Estadu Formasaun Profisionál no Empregu (SEFOPE), Tersa ne’e, oferese formasaun kona-ba otelária nian ba joven sira iha Munisípiu Vikeke.
Diretór Youth Vision Center, Francisco C. M Guterres esplika formasaun ne’e foka liubá atendimentu otelária nian ne’ebé hetan apoiu husi SEFOPE hodi realiza formasaun movel ba foinsa’e sira atu hasa’e abilidade hodi atende kliente sira.
“Téknika abilidade ne’e importante nune’e bele lori ita-nia atividade negósiu la’o bá-oin. Iha xave importante tolu ne’ebé atende ba ita-nia kliente sira mak hanesan atende kliente ho oin mamar, atitude no abilidade atu atrai kliente sira mai iha ita-nia fatin,” Francisco hateten iha ámbitu abertura iha salaun Beloi, Postu Vikeke.
Francisco aprofunda formasaun ne’e Youth Vision Center sei oferese pratika kona-ba te’in, prepara ai-han, prepara fatin toba hanesan iha gues house no prepara meza ba kliente.
“Formasaun ne’e ami sei oferese pratika ba ita-nia formandu sira durante loron lima. Bainhira formasaun ne’e rama formandu sira bele pratika iha sira-nia fatin,” nia hato’o.
Iha biban ne’e, Reprezentante SEFOPE, João M. X. Noronha haktuir realiza formasaun ne’e bazeia ba demanda husi atividade indústria sira-ne’ebé eziste iha Timor-Leste, tanba ne’e mak SEFOPE kolabora ho sentru sira hodi oferese formasaun ba foinsa’e sira.
“Ohin ita oferese formasaun ba ita-nia foinsa’e sira liuliu ba área otelária nian. Formandu sira-ne’e prontu para hala’o servisu. Kompromisu ba fundu ne’e responsabiliza husi SEFOPE hodi reforsa sentru formasaun sira-ne’ebé eziste,” nia subliña.
Nune’e, nia apela formandu sira tenke partisipa másima durante loron lima no valoriza formasaun sira-ne’e tanba formasaun referida la akontese arbiru.
Entretantu, Reprezentante PAM Vikeke, António Amaral hato’o agradesimentu ba Youth Vision Center no SEFOPE ne’ebé oferese formasaun ba foinsa’e sira iha Munisípiu Vikeke.
“Ha’u sente formasaun ne’e importante ba ita-nia foinsa’e oinsá jere atividade otelária nian. Liuhusi formasaun ne’e foinsa’e sira bele aprende di’ak liután,” nia informa.
Formasaun ne’e hahú iha Tersa ne’e (12/08) sei ramata iha Sábadu (16/08). Formasaun ne’e partisipa husi formandu hamutuk na’in-26.
Iha abertura ne’e, partisipa husi reprezentante SEFOPE Munisípiu Vikeke no Komandante Polísia Nasionál Timor-Leste (PNTL) Eskuadra Vikeke Vila.
Jornalista: Vitorino Lopez da Costa
Editór: Xisto Freitas da Piedade
