APC entrega materiál rekuperasaun ba uma-kain 22 iha Fatumea
KOVALIMA ,13 Agostu 2025 (TATOLI) – Diretór Ezekutivu Autoridade Protesaun Sivil,Gui Caeiro, hamutuk ho autoridade munisípiu Kovalima, kuarta-ne’e, entrega materiál rekuperasaun ba vítima dezastre naturál ho uma-kain 22 iha suku Nanu, postu administrativu Fatumea, Munisípiu Kovalima.
“Ha’u atu esplika katak akontesimentu dezastre naturál iha Marsu 2025, foin mak simu materiál rekuperasaun iha tempu bailoron, nune’e husu ba komunidade afetadu sira atu konstrui fali nia- uma”, dehan Diretór Ezekutivu ne’e iha kampu Ladi, ohin
Materiál rekuperasaun ne’ebé distribui hanesan simentu saka 50, kalen tahan 50, besi beton 60 ho osan $1000, nune’e kada uma-kain hetan osan $850 no osan ba transporte $150, inklui ho materiál sira seluk.
Biban ne’e, nia husu ba vítima sira atu konstrui fali uma ne’ebé mak permanente ona.
Iha fatin hanesan, Reprezentante Prezidente Autoridade Munisípiu Kovalima, Filomeno Cardoso, husu ba komunidade afetadu sira atu uza osan hodi konstrui uma.
“Ami mak haree kona-ba dezastre naturál ami esforsu nafatin bainhira komunidade afeitadu ba dezastre naturál ami tuun direta atu haree. Ba vítima ne’ebé mak simu ona material rekuperasaun ami fó tempu fulan tolu ami sei monitoriza ita boot sira tenke konstrui uma ona”, nia alerta.
Jornalista :Celestina Teles
Editór:Florencio Miranda Ximenes
