KOVALIMA ,13 Agostu 2025 (TATOLI)- Autoridade munisípiu (AM) Kovalima liuhusi Sekretáriu Munisipál Administrasaun no Finansa, Alberto Moniz de Araújo, husu ba Conservation Internasionál (CI) atu konstrui morru protesaun iha postu integradu, postu administrativu Tilomar, Munisípiu Kovalima.
“Autoridade Kovalima rekomenda relasiona kondisaun ita-nia fronteira postu integradu Tilomar seidauk iha morru protesaun, maibé parte nasaun viziñu Indonézia sira iha ona iha moru protesaun forte no bee labele sobu, maibé mai ita-nia laiha morru protesaun, nune’e bee tun mai iha Timor”, Autoridade Kovalima, Albeto Moniz de Araújo hato’o iha salaun AMC ohin.
Ho kestaun ne’e, Autoridade iha responsabilidade no husu Conservation Internasionál (CI) prevee orsamentu hodi konstrui morru protesaun ba postu integradu fronteira Tilomar.
“ Ba futuru bele tau netik fundu hodi halo morru protesaun, nune’e bele proteje fatin ne’e, tanba udan kunadu tuun bee sobu ita nia postu ne’e,” nia afirma.
Hataan ba rekomendasaun husi autoridade Kovalima ne’e, Xefe Tekniku Conservation Internasionál, Natalino Babo Martins , dehan konsidera preokupasaun husi autoridade Kovalima, nune’e sei tau iha planu.
“Conservation Internasionál konsidera rekomendasaun husi autoridade atu konstrui morru protesaun, nune’e ita sei tau iha planu estratejiku no sei koopera ho liña ministerial sira, nune’e saida mak CI bele halo no saida mak Governu bele halo”, nia afirma.
Jornalista :Celestina Teles
Editór :Florencio Miranda Ximenes
