BOBONARU, 13 Agostu 2025 (TATOLI)—Korpu Bombeiru Munisípiu Bobonaru enfrenta problema menus rekursu umanu no transporte operasionál atu halo atendimentu iha terrenu bainhira akontese situasaun emerjénsia ruma.
Komandante Korpu Bombeiru Munisípiu Bobonaru, Eusebio Fernandes da Cruz informa totál membru hamutuk na’in-42 maibé númeru ne’e la sufisiente tanba fahe ba ekipa neen (6), iha-ne’ebé kada ekipa ema na’in-hitu (7) ne’ebé koloka ekipa tolu iha Postu Sentrál Maliana no ekipa tolu iha postu integradu Batugadé ho totál membru (15).
“Pur-ezemplu, ekipa ida ema na’in-hitu. Agora, ami-nia kna’ar loloos ne’e iha haat. Ne’e tama hotu iha emerjénsia hanesan inséndiu, ai-tohar, ema monu iha posu, karreta baku-fila. Haat ne’e mak akontese dala-ida,ema na’in haat ne’e ita fahe oinsá,” nia informa ba TATOLI iha kna’ar-fatin, Kuarta ne’e
Kona-ba problema transporte, Komandante Eusebio relata katak daudaun ne’e Korpu Bombeiru Munisípiu Bobonaru iha de’it karreta operasionál rua, ida mantein iha Postu Integradu Batugadé no ida iha Postu Maliana.
Nia argumenta problema ne’e difikulta tebes membru sira atu halo atendimentu emerjénsia liuliu akontesimentu ne’ebé akontese iha oras hanesan, maibé fatin la hanesan.
Maski enfrenta problema maibé Komandante Eusebio dehan katak ne’e la sai dezafiu boot ba Korpu Bombeiru Munisípiu Bobonaru atu atende inséndiu no dezastre naturál ne’ebé akontese iha komunidade nia leet.
“Ami jere rekursu oinsá no buka meiu oinoin tenke ba atende bainhira akontese emerjénsia ruma, tanba ami nia lema mak “Lori ami-nia vida, salva ema-nia vida,” nia hakotu.
Jornalista: Sergio da Cruz
Editór: Xisto Freitas da Piedade
