KOVALIMA ,13 Agostu 2025 (TATOLI)- Konservasaun Internasionál (KI) ne’ebé parseiru ho Ministériu Agrikultura Peska Pekuária no Floresta ho Universidade Nasionál Timor-Leste (UNTL) sei implementa projetu jestaun Basia idrográfika transfronteira entre Indonézia no Timor-Leste, (GEF 7) iha munisípiu Kovalima
Projetu jestaun Basia idrográfika transfronteira ne’e implementa iha nasaun Indonézia liuliu iha Malaka no Belu no iha Timor-Leste implementa iha munisípiu Bononaru no Kovalima
“Ita mai halo sosializasaun ba komunidade atu bele informa kona-ba halo implementasaun projetu referidu ba komunidade sira, saida mak projetu ne’e sei halo iha Kovalima espesiál iha Mota Masin”, Xefe Teknikál Konservation Internasionál, Natalino Babo Martins, dehan ba jornalista sira iha salaun AMC, ohin.
Konservasaun Internasionál (CI) implementa projetu GEF7 hetan suporta husi parseiru internasionál ho nia implementa ho nia durasaun tinan lima foku ba iha mota Talau-Loes ho Mota-Masin ba komunidade ne’ebé perténsia ba hela besik transfronteira entre Indonézia ho Timor-Leste.
Objetivu atu garante jestaun kolaborativa ba ekosistema bee-moos no proteje seguransa ai-han, bee no subsisténsia iha Basia Talau-Loes no Mota Masin ne’ebé hale’u entre fronteira Timor-Leste no Indonézia.
Implementa projetu ne’e, iha nia komponente fundamentál ida-ne’e foka ba komprensaun dinámika ambientál no sosiu-ekonómiku no hari’i kapasidade husi parte interesada lokál sira no projetu hamosu enkuadramentu Jestaun Ambientál no Sosiál.
Iha fatin hanesan, Sekretáriu Munisipál Administrasaun no Finansa,Alberto Moniz de Araújo, reforsa programa ne’e foin ba dahuluk implementa iha fronteira hanesan munisípiu Kovalima no Bobonaru.
“Ha’u tuir ona enkontru iha Bandung hodi ko’alia kona-ba water management boarding no daudaun halo ona implementasaun”, nia dehan.
Jornalista :Celestina Teles
Editór : Florencio Miranda Ximenes
