DILI, 05 Maiu 2026 (TATOLI)-Deputadu husi bankada Frente Revolusionária Timor-Leste Independente (FRRTILIN), Joaquim dos Santos Boraluli, solisita ba Ministériu Edukasaun (ME) atu introdús lia-portugés ho obrigatóriu iha prosesu Ensinu Pré-Eskolár.
Sujestaun ne’e hato’o relasiona ho komemorasaun Loron Mundiál Língua Portugés, iha 05 Maiu, ne’ebé mundu tomak, liuliu Komunidade País Ko’alia Lian Portugés (CPLP, sigla portugés), inklui Timor-Leste selebra.
Deputadu ne’e destaka katak lia-portugés sai ona identidade país nian, tanba konsagra ona iha Konstituisaun hanesan língua ofisiál, ne’ebé signifika la’ós de’it sai instrumentu komunikasaun iha administrasaun públika, maibé hola parte identidade Timór.
Tuir nia, dezenvolvimentu lia-portugés iha país la’o, maibé sei mínimu maski durante iha implementasaun prosesu ensinu ho portugés to’o ensinu sekundáriu. Tanba ne’e, nesesita duni atu reforsa investimentu hahú husi Ensinu Pré-Eskolár.
“Tenke introdús iha eskola infánsia iha territóriu ho obrigatóriu no presiza prodús profesór espesífiku iha lian ne’e atu hanorin estudante iha eskola sira”, nia hateten iha Parlamentu Nasionál, ohin.
Hodi salienta katak portugés nu’udar dalen ofisiál no sidadaun hotu presiza hatene ko’alia, maibé durante ne’e seid’uk tau atensaun ba kestaun referida no iha pré-eskolár balun de’it mak iha kapasidade atu selu profesor portugés hodi hanorin.
“Bainhira ida-ne’e implementa, garante la to’o tinan-10, metade jerasaun foun sira hatene ko’alia portugés”, nia dehan.
Deputadu António Verdiál husi Partidu Kmanek Haburas Unidade Nasionál Timoroan (KHUNTO) kongratula komunidade CPLP iha komemorasaun loron importante ne’e.
Nia husu ba timoroan hotu atu kontinua aprende dalen ne’e, la’ós ba estudante de’it, maibé ba deputadu no membru Governu sira hotu.
Jornalista: Nelson de Sousa
Editora: Maria Auxiliadora
