DILI, 13 Agostu 2025 (TATOLI) – Centro Nacional Chega! Institutu Públiku (CNC, I.P) husu aumentu rihun $900 iha reuniaun Komité Revizaun Orsamentu (KRO), ne’ebé hakarak kontinua foka ba programa prioridade tolu iha Orsamentu Jerál Estadu 2026.
Diretór Ezekutivu CNC, I.P, Hugo Maria Fernandes, hateten tetu fiskál ne’ebé Ministériu Finansa haruka ba CNC hamutuk millaun $1,2 nune’e halo fali pedidu ho aprezenta adisionákl iha reuniaun KRO.
“Karik KRO aseita, 2026 ami sei hetan orsamentu hamutuk millaun $2,2 hodi foku ba ami-nia planu programa boot tolu mak funsionamentu dezenvolvimentu institusionál, kultura patrimóniu, no kombatente libertasaun”, Hugo Fernandes dehan ba Tatoli iha salaun Ministériu Finansa, ohin.
Nia esplika kona-ba programa kultura no patrimóniu ne’e fahe ba subprograma tolu hanesan dezenvolvimentu arkivu, ne’ebé kontinua peskiza istóriku sira hanesan komunidade nia istória no harii muzeu memoriál iha munisípiu sira.
Ba funsionamentu dezenvolvimentu instituisionál ne’e barak liu haree ba jestaun internál nian, oinsá haree ba rekursu umanu, jestaun finansa no seluk tan.
Ba orsamentu tinan ne’e, to’o agora, CNC ezekuta ona 52% husi montante millaun $1,5.
Jornalista: Arminda Fonseca
Editora: Maria Auxiliadora
