CNE sosializa eleisaun munisipál ba estudante Canossa Ossú
VIKEKE, 13 Agostu 2025 (TATOLI)—Komisaun Nasionál Eleisaun (CNE-sigla portugeza) liuhusi Programa Edukasaun Sívika sosializa eleisaun munisipál ba estudante sekundáriu Santa Madalena de Canossa, Postu Administrativu Ossú, Munisípiu Vikeke.
Komisáriu CNE Destakadu Munisípiu Vikeke, Olávio da Costa Monteiro Almeida haktuir objetivu CNE Munisípiu Vikeke realiza sosializasaun eleisaun munisipál ba estudante sira, atu bele kompriende prosesu eleisaun munisipál.
“Programa ida-ne’e sai hanesan formasaun ida ba ita-nia estudante sira kona-ba prosesu eleisaun munispál ne’ebé ita sei hasoru. Eleisaun sira-ne’ebé ita hasoru ona mak hanesan Eleisaun prezidente, eleisaun parlamentár no eleisaun suku, maibé ba eleisaun munisipál seidauk. Tanba ne’e, ita sosializa ba ita-nia eleitór foun sira-ne’e atu sira bele kompriende,” Olávio da Costa hateten iha Salaun Canossa, Kuarta ne’e.
Komisáriu CNE ne’e aprofunda liuhusi sosializasaun ida-ne’e atu promove partisipasaun inkluziva ba eleisaun munisipál iha Estadu Diretu Demokrátiku.
Iha fatin hanesan, Administradór Postu Ossú, José da Silva Amaral ‘Radekiu’ hato’o agaradesimentu ba CNE Munisípiu Vikeke ne’ebé sosializa eleisaun munisipál ba estudante Canossa Ossú hodibele hatene eleisaun munispál.
“Ha’u hato’o agradesimentu ba komisáriu CNE no ekipa sira-ne’ebé mai halo sosializasaun eleisaun munisipál nian ba ita-nia estudante sira, tanba sira mak futuru nasaun Timor-Leste nian. Nune’e, husu estudante sira tenke aproveita oportunidade sensibilizasaun ida-ne’e hodibele kompriende lala’o eleisaun munisipál ne’ebé sei akontese iha futuru,” nia akresenta.
Iha biban hanesan, Diretóra Eskola Sta. Madalena de Canossa Ossú, Francelina Freitas Ximenes hateten sosializasaun ne’e importante ba estudante Canossa tanba liuhusi eleisaun sira-ne’e mak Timor-Leste hetan independénsia totál.
“Uluk tempu okupasaun ita ta’uk ko’alia eleisaun sira-ne’e. Iha momentu eleisaun referendu ami iha kilat okos mak ba tuir votasaun, maibé ohin loron ita hetan ona independésia ita livremente ko’alia prosesu eleisaun sira. Tanba ne’e, husu ba estudante sira proveita sosializasaun ida-ne’e tanba sai matéria sidadania ne’ebé bele sai iha ezame sira tuirmai,” nia haklaken.
Jornalista: Vitorino Lopez da Costa
Editór: Xisto Freitas da Piedade
