KHK apoia fasilidade agríkola ba grupu agrikultór Bibileo
VIKEKE, 13 Agostu 2025 (TATOLI)—Organizasaun Naun Govermentál Knua Haberan Komunidade (KHK) hamutuk ho parseiru Catholic Relief Services (CRS) apoia fasilidade agrikultura hanesan tratór-liman (hand tractor) ki’ik no makína sama hare ba grupu Fitun Hare Oan husi Suku Bibileo, Postu Administrativu Vikeke Vila, Munisípiu Vikeke.
Diretór KHK Munisípiu Vikeke, Augusto Pinto hateten distribuisaun ekipamentu agrikultura ne’e maihusi parseiru CRS hodi tulun agrikultór sira hasa’e produsaun hare.
“Loloos ne’e ami distribui ona ekipamentu sira-ne’e iha tinan kotuk, maibé iha situasaun balun mak ita labele distribui. Tan ne’e, ohin mak ita foin distribui ba grupu ida-ne’e hodi uza ekipamentu sira-ne’e atu hakma’an ita-nia agrikultór sira,” Augusto Pinto dehan iha Suku Bibileo, Kuarta ne’e.
Augusto husu ba servisu Ministériu Agrikultura Munisípiu Vikeke, autoridade lokál Suku Bibileo atu tau-matan ba fasilidade hirak-ne’e.
“Ha’u husu koordenadór grupu no xefe suku kontrola ekipamentu sira-ne’e. Kuandu aban-bainrua mak grupu la’o ladi’ak sei entrega ba suku tanba antes ne’e asina ona karta konkordánsia. Ekipamentu sira-ne’e bele uza ba natar grupu sira-nian no tenke uza ho kuidadu,” nia hato’o.
Iha fatin hanesan, Diretór Nasionál Irrigasun Ministériu Agrikultura, Peska, Pekuária no Floresta (MAPPF) Munisípiu Vikeke, Olívio Freitas Soares hato’o agradesimentu ba KHK no CRS ne’ebé oferese ona ekipamentu agríkola ba agrikultura sira iha Suku Bibileo.
“Liuhusi apoia sira-ne’e ita-nia agrikultór sira bele uza hodi hasa’e produsaun agríkola iha ita-nia Munisípiu Vikeke. Organuizsaun sira-ne’e mak nu’udár Governu ninia forsa hodi ajuda Governu. Tanba ne’e, grupu sira tenke uza ekipamentu sira-ne’e ho di’ak,” nia subliña.
Iha fatin hanesan, Koordenadór Grupu Fitun Hare Oan, Antoninho Rangel hateten husi apoia ekipamentu sira-ne’e bele fasilita ona Grupu Fitun Hare Oan hodi halo natar.
“Ho apoia ne’e ha’u sente bele ajuda ona ami hodi has’e produsaun hare, tanba agora daudaun ami-nia natar hamutuk aktare 16 no membru hamutuk na’in-102 resin. Ami iha fundu $1.650 prepara ba halo manutensuan ba ekipamentu sira-ne’e karik aat,” nia informa.
Nia Antoninho haktuir durante ne’e grupu halo atividade rai no impresta osan no atividade agrikultura ne’ebé implementa iha Suku Bibileo.
Iha distribuisaun ekipamentu ne’e partisipa husi membru Grupu Fitun Hare Oan, reprezentante CRS, KHK no komunidade husi Suku Bibileo.
Jornalista: Vitorino Lopez da Costa
Editór: Xisto Freitas da Piedade
