Komisaun F husu MS funsiona Sentru Kardíaku iha Lahane
DILI, 13 Agostu 2025 (TATOLI)-Komisaun F iha Parlamentu Nasionál ba Asuntu Saúde, Igualdade Jéneru no Inkluzaun Sosiál husu Ministériu Saúde (MS) atu kompleta ekipamentu iha Sentru Kardíaku Lahane hodi bele fó ona atendimentu ba pasiente sira.
Prezidente Komisaun F, Maria Gorumali Barreto, dehan informasaun ne’ebé simu husi MS katak prepara hela ekipamentu no médiku espesialista iha sentru referidu. Tanba sentru ne’e, sei fó tratamentu espesífiku ba iha pasiente sira ne’ebé sofre moras fuan.
Nia dehan, iha Orsamentu Jerál Estadu (OJE) 2025, ministériu prevee ona atu kompleta ekipamentu sira, nune’e bele funsiona, maibé to’o ona Agostu seidauk realiza.
Tanba ne’e, tuir nia, presiza aselera atu kumpre planu ne’ebé iha hodi iha tinan ne’e funsiona no fó ona atendimentu ba pasiente iha rai-laran.
“Husu nafatin ba Governu, liuhusi Ministériu Saúde, atu tau atensaun, aselera prosesu ne’e [funsionamentu sentru]”, nia afirma.
Deputada CNRT ne’e dehan MS mós halo kooperasaun ho ospitál balun iha Darwin-Austrália hodi apoia rekursu umanu, liuliu médiku espesialista ba kardiolojia.
Nune’e mós deputadu membru Komisaun F, Helena Martins, dehan Governu tau duni orsamentu hodi kontinua dezenvolve Sentru Kardíaku iha Lahane no ekipamentu balun tau ona iha tempu Oitavu Governu nian, maibé to’o agora seidauk halo instalasaun.
“Ekipamentu balun ne’ebé iha ona, buka atu instala. Se la’e ita sosa tiha ho montante boot, mai so’e hela de’it iha fatin, no se ekipamentu la kompletu buka atu kompleta. Ida-ne’e mak hotu-hotu nia hakarak atu minimiza ona transferénsia moras fuan ba estranjeiru”, nia preokupa.
Deputada FRETILIN ne’e iha esperansa bainhira sentru ne’e funsiona maka sei redús pasiente bá estranjeiru, liuliu ho moras fuan bele hetan tratamentu de’it iha rai-laran no sei hamenus mós kustu.
Notísia relevante: Assanami: Tau ekipamentu médiku iha sentru kardíaku Lahane
Jornalista: Nelson de Sousa
Editora: Maria Auxiliadora
