DILI, 13 Agostu 2025 (TATOLI) – Sekretaria Estadu Komunikasaun Sosiál (SEKOMS) propoin adisionál millaun $2,5 iha reuniaun Komité Revizaun Orsamentu (KRO) ba 2026.
Sekretáriu Estadu Komunikasaun Sosiál, Expedito Loro Dias Ximenes, informa katak montante inisiál ne’ebé haruka ba Ministériu Finansa hamutuk millaun $8, maibé depoizde halo análize hatún ba millaun $4,5.
“Husi orsamentu ne’e ami halo análize ba planu no programa prioridade sira katak la to’o, entaun ohin SEKOMS lori adisionál millaun $2,5 iha KRO”, Expedito Ximenes hateten iha Ministériu Finansa, ohin.
Nia esplika katak husi adisionál ne’e foku ba saláriu no vensimentu hodi selu ba funsionáriu kontratadu no kazuál sira hamutuk 157, nomós ne’e prevee rihun $100 ba SEKOMS atu apoia ba jornalista sira kobertura ba atividade Primeiru-Ministru, Xanana Gusmão, nian iha nasionál no estranjeiru.
Prioridade seluk mak atu instala torre tolu iha Lautein, Ainaru no Bobonaru, tanba nia konstrusaun hotu ona 100% no tinan oin atu instala. Objetivu husi torre tolu ne’e atu alarga kobertura RTTL nian iha territóriu tomak.
“Husi adisionál ne’e, rihun $400 ba RTTL atu atende kopa mundiál iha 2026, ne’ebé koopera ho empreza ETO, nomós liuhusi adisionál ne’ebé ha’u aprezenta, RTTL husu rihun $15 atu sosa ekipamentu dijitál ba outside broadcasting van tolu ne’ebé iha”, nia esplika.
Ba programa seluk mak kontinua formasaun ba jornalista sira iha lia-portugés ho serbisu hamutuk ho Instituto Camões, liuhusi Programa Konsultóriu Língua ba Jornalista (CLJ), ne’ebé iha mós orsamentu espesiál ba revizór sira ne’ebé hala’o knaar iha RTTL, GMN, no Tatoli, nomós ba jornál sira balun ne’ebé publika notísia portugés. Aleinde ne’e, liuhusi transferensia públika apoia ba asosiasaun jornalista sira, ba rádiu komunidade, nomós ba sentru audivizuál Max Sthal.
Husi adisionál ne’e, KRO la deside maibé sei halo diskusaun entre membru KRO ho Prezidente, depois sei fó fali rezultadu iha tempu oin mai.
Kona-ba ezekusaun orsamentu SEKOMS nian ba tinan ne’e, to’o Agostu atinje ona 59,5% husi totál verba millaun $6-resin.
Jornalista: Arminda Fonseca
Editora: Maria Auxiliadora
