DILI, 14 Agostu 2025 (TATOLI)—Autoridade Inspesaun no Fiskalizasaun Atividade Ekonomia Sanitária no Alimentár (AIFAESA), hahú iha 11-13 Agostu, hala’o ona sensibilizasaun ba operedór ekonómiku ambulante hamutuk 401 iha Dili, atu faan hahan-tasak iha dalan ninin ho moos no seguru.
“Ami tun direta halo sensibilizasaun ba operador ambulante sira iha kapital Dili, atu fó hanoin ba sira oinsá faan hahan ne’ebé moos,” Inspetora Autoridade Inspesaun no Fiskalisasaun Atividade Ekonomia Sanitária no Alimentár (AIFAESA), Odete Viegas, hateten ba Agência TATOLI, iha nia kna’ar fatin, Matadoru, ohin.
Nia hateten, AIFAESA seidauk fó sansaun ba operadór ekonómiku sira, tanba sira hakarak konsiensializa lai sira-nia hanoin hodi halo negósiu ne’ebé dignu.
“Atividade inspesaun ne’ebe AIFAESA hala’o ona ba operadór ambulánsia faan hahan iha dalan ninin sira, durante loron tolu hahú husi loron 11 to’o 13 Agostu, ekpa sira halo inspensaun iha dader no kalan hodi halo sensibilizasaun no divulga informasaun ba operadór ekonómiku sira, atu nune’e bele prepara ai-han ne’ebé seguru. Iha entermu preparasaun, fatin, no mós ijene pesoál no ijene jerál ba iha fatin ne’ebé sira faan ba no kualidade ai-han, jestaun lixu, informasaun sira-ne’e mak inspetór sira presiza hato’o ba ita-nia operadór ekonómiku sira-ne’ebé mak hala’o sira-nia atividade negósiu faan hahan iha dalan ninin,” nia esplika.
Nia dehan, objetivu husi sensibilizasaun ne’e barak mak seidauk hatene lala’ok sira ne’e, entaun AIFAESA nia obrigasaun atu disemina informasaun pertinente ba operadór ambulatóriu sira, atu nune’e presta duni servisu ida-ne’ebe labele fó risku ba saúde umana.
“Iha momentu ne’e mós ita fahe brosura ba ita-nia operadó ekonómiku sira iha postu administrativa haat iha Munisípiu Dili nian mak postu administrativu Dom Aleixo, Vera Cruz, Cristo Rei no Na’in Feto,” nia relata.
Nia haktuir, ekipa sira tuir mai sei nafatin halo sensibilizasaun informasaun ba komunidade ne’ebé faan hahan-tasak iha dalan ninin sira iha ona konxiénsia servisu ne’ebé sira halo seidauk loos no presiza hadi’a.
“Hahú agora ba oin, ita tama ba ASEAN, ita mós tama ona iha komersiu mundiál nian, entaun ita prepara ita-nia an hodi kompete iha nível rejional no nível global. Entaun, hatudu ona ba mundu katak Timor nasaun ne’ebé kiik maibé simu responsabilidade tama iha membru ASEAN,” nia hateten.
Aleinde ne’e, AIFAESA nia papel atu asegura ai-han ne’ebé tama iha Timor-Leste hodi asegura mós nia kualidade katak ai-han sira ne’e seguru ba ema nia moris.
Jornalista : Felicidade Ximenes
Editór : Cancio Ximenes
