DILI, 14 Agostu 2025 (TATOLI)—Governu Singapura liuhusi Embaixadór Singapura ba Timor-Leste, Robin Hu, atualiza programa formasaun partikulár ba ofisial juventude Timor-Leste ba Primeiru Ministru, Kay Rala Xanana Gusmão, nu’udár parte ida hodi apoiu adezaun Timor-Leste ba membru plenu ASEAN.
“Ha’u atualiza ba Primeiru-Ministru kona-ba programa formasaun ne’ebé hanaran Programa Apoiu ba Prontidaun Singapura Timor ASEAN, ne’ebé hahú iha tinan 2022. Iha asuntu ne’e, ami mós hadi’a ona programa partikulár hodi inkorpora karáter foun lubuk ida,” Embaixadór Singapura ba Timor-Leste, Robin Hu, informa ba jornalista sira hafoin ramata enkontru ho Primeiru Ministru, Kay Rala Xanana Gusmão, iha Palásiu Governu, ohin.
Nia hatutan, iha área hadi’a dahuluk mak hatán ba Prezidente Repúblika José Ramos-Horta nia pedidu atu Singapura dezenvolve programa formasaun partikulár ida ba ofisiál joven timoroan sira, atu aprende kona-ba oinsá atu hala’o di’ak liután governasaun administrasaun públika nian.
Tanba ne’e, sira sei inkorpora iha Karéterístika daruak mak programa parseria ida iha konjunsaun ho Institutu Sudeste Aziátiku Institutu nian, ne’ebé mak grupu hanoin ida-ne’ebé bazeia iha Singapura, ASEAN, atu dezenvolve módulu ida atu nune’e bele ajuda ofisiál sira iha Timór atu komprende di’ak liután oinsá navega ASEAN,
“Oinsá kontribui ba ASEAN no prontu ba enkontru no atividade barak ne’ebé adezaun ba ASEAN sei implika. Ikus liu, iha Singapura mós ita identifika ona peritu na’in-rua, ida mak peritu iha área komérsiu internasionál no komérsiu ASEAN nian,” nia esplika.
Iha área ASEAN nian, nia dehan, iha tratadu barak kona-ba komérsiu no ekonómiku no investimentu, ne’ebé Timór sei tenke sai hanesan asinatura ida atu nune’e bele sai membru plenu ASEAN nian mós, atu nune’e Singapura disponibiliza hela peritu sira-ne’e ba asesu ofisiál sira Timór nian.
Aleinde ida-ne’e, Singapura mós disponibiliza hela diplomata ida-ne’ebé matenek tebes ne’ebé uluk hanesan Diretór Jerál Sekretariadu ASEAN nian ba ASEAN atu bele fornese di’ak liután hanoin kona-ba asuntu polítiku, jeopolítiku no administrativu hotu-hotu ne’ebé relasiona ho ASEAN.
“Entaun, Primeiru-Ministru (Xanana) kontente ho atualizasaun partikulár ne’ebá no ami hein programa ida-ne’ebé susesu tebes ba tinan 2025 to’o 2028,” nia dehan.
Jornalista : Alexandra da Costa
Editór : Cancio Ximenes
