Eskola Sekundária Paralela Uaguia laiha morru protesaun, difikulta prosesu aprendizajen

VIKEKE, 14 Agostu 2025 (TATOLI)—Koordenadór Eskola Sekundária Paralela Uaguia, Eurosio Soares Ruas informa edifísiu Ensinu Sekundária Paralelu Olokasa Uaguia no EBF 84 Uaguia, Postu Administrativu Ossú laiha morru protesaun hodi difikulta prosesu aprendizajen.

“Ami laiha morru protesaun nune’e difikulta prosesu aprendizajen, tanba iha tempu aprendizajen la’o ema li’ur tama, karreta no motorizada halai bá-mai sira tenke hateke no animál sira mós tama, entaun estudante sira la fó-atensaun di’ak ba prosesu aprendizajen,” Eurosio Soares Ruas hateten ba TATOLI iha Eskola Sekundária Paralela Uaguia, Kinta ne’e.

Tanba ne’e, nia husu ba Ministériu Edukasaun (ME) hodi konstrui morru protesaun atu asegura eskola rua referida.

Nia haktuir katak preokupasaun ne’e parte eskola hato’o beibeik ona, maibé seiduk iha resposta nune’e iha tempu badak sei kontinua aprezenta pedidu ba ME hodi tau-matan ba morru protesaun.

Iha fatin hanesan, Administradór Postu Ossú, José da Silva Amaral ‘Radekiu’ haktuir kona-ba morru protesaun ba eskola Uaguia ne’ebé difikulta prosesu aprendizajen ne’ebé parte autoridade mós sei aprezenta ba parte kompetente hodi konstrui morru.

“Eskola ne’e morru laiha ita haree difikulta prosesu aprendizajen. Ha’u sei fó-atensaun ne’ebé sei hato’o ba parte relevante sira hodi konstrui morru hodi asegura prosesu aprendizajen,” autoridade ne’e esplika.

Tuir dadus, totál estudante husi X to’o XII iha Eskola Sekundária Paralela Uaguia hamutuk na’in-131 no profesór na’in-sia (9).

Jornalista: Vitorino Lopez da Costa

Editór: Xisto Freitas da Piedade