Maria Terezinha Viegas sei simu pose hanesan Embaixadora Timor-Leste ba Japaun
DILI, 14 Agostu 2025 (TATOLI) – Primeira Vise-Prezidente Parlamentu Nasionál, Maria Terezinha Viegas, hetan fiar husi Prezidente Repúblika, José Ramos-Horta, hodi asume knaar hanesan Embaixadora Timor-Leste ba Japaun, ne’ebé sei simu pose iha loron 18 fulan-Agostu ne’e.
“Imi husu ona, ne’ebé ha’u hakarak adianta de’it, iha 18 Agostu simu pose [ hanesan Embaixadora Timor-Leste] ba Japaun”, Maria Terezinha Viegas informa iha Parlamentu, ohin.
Deputada husi bankada CNRT ne’e adianta katak sei iha subtituisaun temporária ba nia knaar hanesan deputada, maibé ba kargu Primeira Vise-Prezidente ne’ebé nia asume ne’e tenke rezigna-an.
“Depois Parlamentu mak hili fali [Primeiru Vise-Prezidente]. Ida-ne’e mak prosesu baibain Parlamentu nian”, dehan.
Nia salienta katak atu hili fali deputadu foun atu substitui ne’e fila ba desizaun bankada nian, tuir partidu nia orientasaun no liuhusi eleisaun iha plenária.
Kestiona kona-ba motivasaun saida mak iha hodi hakarak hili ba embaixadora mezmu daudaun asume hela knaar Primeira Vise-Prezidente, deputada ne’e hateten ida-ne’e haree liu ba konfiansa.
“La’ós tanba pasta. Se hanesan agora hatene hela serbisu loron-loron, tanba misaun no konfiansa ne’ebé fó mai ha’u, ida ne’e la fásil, knaar foun dezafiu foun, moris mak ida-ne’e duni. Ita tenke prontu iha ne’ebé de’it, tanba fin bá la serve nasaun seluk, maibé serve ha’u nia nasaun iha rai-liur”, nia realsa.
Relembra katak, iha 26 Juñu 2023, liuhusi reuniaun plenária hili deputada Maria Terezinha Viegas ba Primeira Vise no Alexandrino Afonso Nunes ba Segundu Vise-Prezidente Parlamentu Nasionál.
Maria Terezinha Viegas sei substitui Embaixadór Ilídio Ximenes da Costa ne’ebé ramata ona nia misaun. Embaixadór Ilídio simu pose iha 28 Janeiru 2020 hodi hala’o misaun diplomátiku iha Japaun.
Jornalista: Nelson de Sousa
Editora: Maria Auxiliadora
