DILI, 14 Agostu 2025 (TATOLI) – Polísia Nasionál Timor-Leste (PNTL), liuhusi Unidade Espesiál Polísia (UEP) selebra nia aniversáriu ezisténsia ba da-16, husi 2009-2025, ne’ebé kaer ba pilár tolu mak disiplina, profisionalizmu, no espesializasaun.
Komandante Jerál PNTL, Komisáriu Jerál Polísia Henrique da Costa, hateten ezisténsia UEP importante tanba nu’udar unidade ida ne’ebé sempre prontu hodi fó resposta no kapasidade ne’ebé aas, atu hakat ba situasaun ne’ebé risku no komplikadu.
Tuir nia, UEP nu’udar parte importante ida iha PNTL, tanba misaun unidade ida-ne’e diversu tebes, nia envolve iha área espesífika sira ho empregu operasionál ne’ebé la para durante oras 24 nia-laran, nein iha kondisaun tempu no serbisu ne’ebé difísil.
“Unidade Espesiál Polísia importante tebes atu fó seguransa ba ema hotu iha Timór laran-tomak. Ha’u hakarak destaka pilár importante tolu ne’ebé membru Polísia uza iha serbisu mak disiplina, profisionalizmu, no espesializasaun”, Henrique da Costa hateten iha Bairru Pité, Dili, ohin.
Nia dehan disiplina mak sai baze ba ierarkia no efikásia operasionál, forsa espesiál ne’ebé laiha disiplina bele sai vulneravel no perigozu ba nia an no ema seluk. Maibé, disiplina transforma ema ida ba ekipa ida sólida, konfiavel, tanba disiplina mak forma karáter no orienta atu aseita desizaun no garante konfiansa públiku ba iha PNTL.
“Profisionalizmu mak hodi halo diferensa entre ajente komún no ajenda eselente sira. Ita-nia maneira halo desizaun iha tempu tensaun bainhira hasoru sidadaun no hatudu nia nivel no komportamentu ho nia legalidade sira, importante imparsialidade no respeita ba direitu umanu. Tanba sosiedade sira fó konfiansa ba Polísia sira no hein ita-nia resposta hatudu liuhusi ita-nia asaun”, nia realsa.
Kona-ba espesializasaun, dezafiu interna evolui maka’as no dinámiku krimilidade organizada ameasa sira iha fronteira disturbu sira, no terrorizmu ejize resposta téknika moderna ho kapasidade ne’ebé aas tebes hodi hetan treinamentu beibeik hodi aprofunda koñesimentu tékniku no domina iha tátika no uza ekipamentu ne’ebé adekuadu.
“Ha’u hakarak reafirma atu kontinua fó prioridade formasaun ba Unidade Espesiál ida-ne’e ho kooperasaun ho instituisaun nasionál no internasional hodi reforsa programa treinamentu espesífiku iha área sira hanesan orden públika, kontra terrorizmu, intervensaun tátika, sinotékniku no proteje entidade importante”, dehan.
Komandante ne’e espresa nia profunda rekoñesimentu ba sakrifísiu UPF nian, tanba kontinua firme ho disiplina, determinasaun no profisionalizmu. “La kle’ur Timor-Leste sei adere ba nasaun ASEAN. Ita sei hasoru dezafiu barak, liuliu kona-ba risku krime organizadu hanesan krime sibernétiku, money laundry, finansiamentu terrorizmu, tráfiku umanu no seluk tan. Krime hirak ne’e hotu agora balun akontese ona iha Timor-Leste. Tanba ne’e PNTL presiza atu adapta an iha dezenvolvimentu teknolojia ohin loron, haforsa kapasidade dijitál hodi bele responde ba buat hirak ne’ebé ha’u temi”, nia apela.
PNTL sei konsolida estrutura ida efisiente ho prontidaun atu responde ba desafiu seguransa interna. “Parabéns UEP, nafatin sai orgullu ba rai no povu ida-ne’e. Hamutuk ita hametin konfiansa”, nia hato’o.
Iha fatin hanesan, Komandante UEP, Superentindente Damião Correia, hateten ezisténsia UEP kompostu husi Batallaun Orden Públika (BOP), Kompañia Operasaun Espesiál (KOE), Kompañia Seguransa Pesoál (CSP), Unidade Misaun Jenériku, ne’ebé atu garante pás no estabilidade, atu ema hotu bele ezerse nia direitu no liberdade.
UEP nia funsaun mak halo seguransa másima ba nasaun ne’e durante oras 24 nia-laran, no fó apoiu ba atividade sira internasionál sira ne’ebé durante ne’e la’o iha nasaun, nomós fó tulun halo seguransa másima ba entidade alta sira tantu internasionál komu nasionál.
Iha aniversáriu ba da-16 ne’e, membru UEP sira hatudu atrasaun oinsá halo seguransa ba entidade alta sira, no atua situasaun hasoru kriminozu no seluk tan.
Partisipante sira iha serimónia aniversáriu ne’e Ministru Justisa Sérgio Hornai , Ministru Interiór, Francisco da Costa Guterres, Sekretáriu Estadu Kooperativa, Arsénio Pereira no seluk tan.
Ministru Interiór husu UEP kontinua hatudu disiplina iha serbisu
Iha eventu ne’e, Ministru Interiór, Francisco da Costa Guterres, husu ba membru UEP kontinua hatudu disiplina iha serbisu.
“Ha’u husu ba ita-boot sira hotu atu hametin di’ak liután imi-nia disiplina, imi-nia dedikasaun, nune’e ita hamutuk serbí povu no rai-ida ne’e. Iha ita bo’ot sira-nia kaba’as tula hela esperansa ida, esperansa ida ne’ebé katak sei asegura rai ne’e hakmatek atu povu bele hala’o ninia vida lorloron ho di’ak”, Francisco da Costa Guterres hateten.
Nia salienta esperansa ne’ebé povu fó tenke tane aas profisionalizmu, disiplina, nune’e kontinua hetan konfiansa husi povu atu serbisu hamutuk nafatin.
Hodi lori Governu nia naran, ministru hato’o katak sei kontinua tau matan ba PNTL, asegura infrastrutura no moderniza ekipamentu, kria kondisaun hodi hala’o serbisu ne’e ho di’ak.
“Ida-ne’e mak important, kaer metin nafatin disiplina ho profisionalizmu. Hakarak mós hato’o parabéns ba ita-bo’ot sira, tanba asegura eventu lubun boot sira mak hanesan Jogu CPLP, no seluk tan, ne’ebé hala’o iha ita-nia rai”, dehan.
Ho seguransa másima ne’ebé PNTL halo iha eventu boot sira durante ne’e ema hotu apresia tanba situasaun la’o hakmatek no povu tomak asiste jogu ho di’ak.
Jornalista: Arminda Fonseca
Editora: Maria Auxiliadora
