DILI, 14 Agostu 2025 (TATOLI) – Primeiru-Ministru, Xanana Gusmão, relata serbisu Governu nian ba Prezidente Repúblika, José Ramos-Horta, kona-ba reuniaun Komité Revizaun Orsamentu (KRO) 2026, nomós aprovasaun proposta Lei Rejime Jurídiku Arte Marsiál husi Konsellu Ministru.
“Ha’u mai informa ba Prezidente Repúblika katak ha’u iha KRO, no informa mós katak iha Konsellu Ministru ami halo ona rezolusaun ida kona-ba arte marsiál. Loloos atu taka agora kedas, maibé halo regra di’ak fó sira atu funsiona ho regra ne’e. Karik la tuir mak taka”, Xanana Gusmão hateten iha Palásiu Prezidensiál, Bairru Pité, ohin.
Lembra katak, iha 30 Jullu 2025, Governu aprova proposta Lei kona-ba Rejime Jurídiku Arte Marsiál ne’ebé aprezenta husi Ministru Interiór, Francisco da Costa Guterres, ne’ebé sei hato’o ba Parlamentu Nasionál.
Objetivu husi lei ne’e bele iha supervizaun no kontrolu prátika arte marsiál hodi evita sai fali arte konflitu no violénsia, proposta lei ne’e sei hatún ba Parlamentu Nasionál hodi halo debate públiku.
Inisiativa lejizlativa ida-ne’e mak atu estabelese rejime jurídiku ida ne’ebé klaru ba ensinu aprendizajen no prátika arte marsiál iha Timor-Leste, hodi asegura katak atividade ne’e hala’o ho seguru, ordenadu no tuir prinsípiu orden públika nian.
Proposta ne’e ho objetivu atu prevene no kombate violénsia ne’ebé asosiadu ho prátika arte marsiál, liuliu entre joven sira, liuhusi kria mekanizmu monitorizasaun, fiskalizasaun no responsabilizasaun ne’ebé efikás ba sentru, klube, no ajente sira-ne’ebé envolve.
Jornalista: Arminda Fonseca
Editora: Maria Auxiliadora
