SEKoop Kovalima prioriza kooperativa uniaun kreditu no produsaun agrikóla
KOVALIMA , 14 Agostu 2025 (TATOLI)– Sekretáriu Estadu Kooperativa (SECOOP), liuhusi delegasaun territoriál munisípiu Kovalima fó prioridade atu halo implementa ba programa hanesan kooperativa uniaun kreditu (CU) no kooperativa produsaun agrikóla.
Molok atu estabele kooperativa funsionáriu sira husi SEKoop sei hala’o atividade sensibilizasaun kona-ba lala’ok kooperativa no oinsá atu estabelese kooperativa, formasaun bázika hodi ko’alia kona-ba forma estrutura, estatutu no kontabilidade.
“Prosesu forma kooperativa ho nia lala’ok rai no impresta osan ho nia kritéria mak hanesan kada grupu ida ho nia membru na’in-15, forma estrutura hafoin rai osan depende sira nia kbi’it ne’ebé iha, maibé membru obrigatóriu tenke rai osan $5 kada-fulan,” dehan Koordenadór SEKoop munisípiu Kovalima , Alvaro dos Santos.
Bazeia ba dekretu-lei númeru 76/2022 , 24 Outobru altera husi dekretu-lei númeru 16/2004, 1 Outobru hodi define ramu kooperativa mak hanesan produsaun servisu, konsumu, komérsiu ka fila lima, agrikultura, kreditu ka fiar malu, uma no konstrusaun, produsaun operariu,artezenatu,peska, kultura, servisu, ensinu, sosilidariedade sosiál , transporte no turizmu.
Koordenadór ne’e esplika katak, programa sira seluk mak hanesan kooperativa produsaun hare ba área agrikultura foku ba grupu sira kuda modo, hakiak animál no kuda Bafo Kayrala
Tuir dadus ne’ebé mak iha 2025 ne’e, SEKoop kuda ona Bafo Kayrala hamutuk ektare 11 ne’ebé kuda iha postu administrativu tolu mak hanesan, postu administrativu Fohorem ho ektare tolu, Tilomar ektare haat no Maukatar hamutuk ektare ida.
Programa ba toluk mak halo monitorizasaun ba kooperativa sira ne’ebé mak eziste ona iha munisípiu Kovalima hamutuk 19, husi númeru ne’e kooperativa ne’ebé mak ativa mak hamutuk sia no kooperativa hitu la ativa, hitu hetan suspensaun tan ho razaun la submete relatóriu.
Aleinde, SEKoop mós estabelese ona federasaun multi setorál hamutuk riin hitu hanesan sumbriña ida ba kooperativa hotu ne’ebé mak estabelese ona iha munisípiu Kovalima.
Daudaun totál funsionáriu iha SECOOP Kovalima hamutuk 13 mak hala’o servisu hodi halo monitorizasaun programa ne’ebé mak implementa ona iha munisípiu Kovalima. Ho implementasaun progama sira ne’e presiza aumenta funsionáriu no falta ekipamentu eletróniku mak hanesan komputadór hodi fasilita servisu funsionáriu sira.
Tuir planu atu estabelese tan sentru produsaun integradu iha aldeia Halik, suku Beco, Postu Suai hodi rai produsaun hotu ne’ebé mak grupu kooperativa sira prodús ona bazeia ba programa prioridade SEKoop.
Jornalista :Celestina Teles
Editór:Florencio Miranda Ximenes
