KOVALIMA, 15 Agostu 2025 (TATOLI)–Komisaun Nasionál ba Eleisaun (CNE- sigla portugés) ho Prezidente Autoridade Munisípiu (PAM), rekomenda ba debatór partidu polítiku ne’ebé asentu parlamentár halo debate labele insulta malu.
Vise Prezidente CNE, Domingos Barreto, esplika bazeia ba konstruisaun RDTL artigu 65 no lei eleitorál númeru 15/2021 nia kna’ar mak atu hala’o edukasaun sívika ne’ebé hala’o ona iha territóriu.
Atividade debate lideransa polítiku lokál ne’e ligadu ho edukasaun sívika ho nia tema “ita pronto ba eleisaun munisipál. Ho objetivu fahe informasaun no hasa’e konsiénsia sívika nu’udar sidadaun hodi partisipa iha eleisaun munisipál.
“Ita hamutuk iha ne’e ho hanoin, CNE liuhosi nia plenária deside muda kontestu edukasaun sívika ho debate partidu polítiku, ita halo hodi prepara no halo implementasaun kona-ba desentralizasaun administrative no podér lokál”, Domingos Barreto hato’o liuhosi nia diskursu iha salaun Autoridade Munisípiu Kovalima, ohin.
Atividade ne’e hodi ko’alia kona-ba vizaun, misaun no planu ba dezenvolvimentu iha future, nune’e povu bele deside. Tanba ne’e, husu ba debatidór sira atu debate ho argumentu labele insultu malu, tau interese nasionál atu dezenvolve munisípiu hodi ko’alia kona-ba vizaun no misaun.
PAM Kovalima, Miguel Armada Cardoso, dehan lidér parpol hanesan aman no autór atu foti desizaun, nune’e bainhira foti desizaun presiza hanoin.
“Debatór parpol Kovalima nia hato’o de’it partidu nia vizaun no misaun, labele insulta malu, presiza haree Kovalima nia di’ak”, afirma nia.
Nia dehan Planu Dezenvolvimentu Nasionál (PDN) mak hamosu Planu Dezenvolvimentu Munisipál (PDM), nune’e kada tinan hodi elabora planu asaun anuál (PAA) ne’ebé nia programa mai husi suku liuhosi reuniaun asembleia postu administrativu to’o mai munisípiu.
Tuir nia observasaun parpol balun seidauk iha sede partidu polítiku iha munisípiu, tanba sede parpol mak atu halibur polítiku na’in sira hodi hato’o sira-nia hanoin ruma.
“Ha’u agradese no louva, maibé iha fatin balun seidauk iha sede partidu polítiku, tanba ne’e presiza atu haree sede parpol, ita fiar sede atu halibur politika na’in sira hodi hato’o sira-nia hanoin ruma iha sede parpol”, nia fó hanoin.
Notísia relevante: MAE fasilita formasaun tékniku lideransa ba dirijente-autoridade munisipál 12 iha Kovalima
Jornalista : Celestina Teles
Editora : Rita Almeida
