VIKEKE, 15 Agostu 2025 (TATOLI)–Governu liuhusi Ministériu Administrasaun Estatál (MAE) nomea José da Silva Amaral ‘Radekiu’ substitui Administradór Postu Ossú, Feliciano da Costa Guterres hodi lidera Postu Administrativu Ossú, Munisípiu Vikeke.
Razaun substitui tanba Eis Administradór Postu Ossú Feliciano da Costa Guterres moras liu ona fulan tolu.
Atuál Administradór Postu Ossú, José da Silva Amaral ‘Radekiu’ hateten konfiansa ne’ebé hetan sei hamutuk ho povu Ossú hodi hametin unidade kontribui ba dezenvolvimentu iha Postu Administrativu Ossú.
“Ba konfiansa ne’ebé Governu fó ba ha’u, hakarak kria unidade tanba unidade mak ita bele halo dezenvolvimentu. Tan e’e, ita tenke hamutuk entre komunidade inklui instituisaun sira-ne’ebé eziste iha Postu Administrativu Ossú,” Radekiu hateten ba TATOLI iha Postu Administrativu Ossú, Sesta ne’e.
Radekiu afirma katak iha nia mandatu ne’e sei tau prioridade ba bee-moos ba populasaun Postu Ossú tanba durante ne’e populasaun maioria enfrenta difikuldade ba bee-moos.
Tuir dadus, Postu Administrativu Ossú iha suku sanulu ho totál populasaun hamutuk 15.612 resin.
Kona-ba melloramentu bee-moos iha Postu Ossú Vila, Bee Timor-Leste, Empreza Públika (BTL, E.P.) foin hahû dada bee-moos husi mundu perdidu. Obra referida seidauk finalizadu. Obra melloramentu bee-moos ne’e sei benefísia populasaun 2.850 husi uma-kain 475.
Jornalista: Vitorino Lopez da Costa
Editór: Xisto Freitas da Piedade
