Governu prepara millaun $5 ba dezenvolvimentu turizmu relijiozu iha Tasi-tolu
DILI, 15 Agostu 2025 (TATOLI)—Governu prepara orsamentu estimasaun ho montante millaun $5 ba konstrusaun turizmu relijiozu iha Tasi-tolu.
“Turizmu relijiozu iha Tasi-tolu ne’e sei iha diskusaun preliminár. Ami foin simu dezeñu no presiza Ajénsia Dezenvolvimentu Nasionál (ADN) verifika lai pois entrega ba Ministériu Administrasaun Estatál (MAE) hodi aprezenta ba Konsellu Administrasaun Fundu Infraestrutura (KAFI) para aprova. Maibé orsamentu estimasaun ba projetu ne’e kuaze millaun $5,” Ministru Planeamentu no Investimentu Estratéjiku, Gastão Sousa, informa ba Ajénsia TATOLI, iha Auditóriu Ministériu Finansa (MF), Aitarak-laran, Sesta ne’e.
Notísia relevante : Konstrui Estádiu iha Tasi-Tolu sei la destroi fatin istóriku
Governante ne’e garante projetu ne’e sei realiza iha tinan ne’e tanba prosesu hotu loos ona no hein ADN verifika dezeñu.
Antes ne’e, Antigu Embaixadór Vatikanu iha Timor-Leste, Núnsiu Apostóliku, Monseñor Marco Sprizzi, hateten, konstrusaun Altar Misa ba vizita Papa Francisco iha Tasi-tolu sei husik hela hanesan muzeu ba timoroan no turista sira.
Monseñor dehan, konstrusaun palku boot iha Tasi-tolu bele sai permanente hafoin liu tiha Papa Francisco nia vizita, iha loron boot ka loron nasionál ruma sei bele utiliza ba atividade sira seluk.
Daudaun ne’e, Governu harii hela kadeira beton hamutuk 144 iha Tasi-tolu, ho nia progresu serbisu atinje ona 70%, ne’ebé tuir planu sei finaliza iha tempu badak.
Jornalista : Osória Marques
Editora : Julia Chatarina
