DILI, 15 Agostu 2025 (TATOLI)—Autoridade Inspesaun no Fiskalizasaun Atividade Ekonomia Sanitária no Alimentár (AIFAESA), hahú husi Jullu to’o Agostu ne’e, AIFAESA kontribui reseita $69,039.00 ba kofre Estadu.
“Iha fulan-Jullu no meadu Agostu, AIFAESA hatama reseita ba kofre Estadu ho montante $69,039.00 husi infratór hamutuk 96,” Inspetora Autoridade Inspesaun no Fiskalizasaun Atividade Ekonomia Sanitária no Alimentár (AIFAESA), Odete Viegas, hateten ba Agência Tatoli iha nia kna’ar fatin, Matadoru, ohin.
Aleinde ne’e, nia informa, iha Janeiru mai to’o Marsu ne’e, AIFAESA hatama reseita hamutuk $43,795 ne’ebé halibru ka selu husi infratór hamutuk 78, no husi Abril mai to’o Juñu, AIFAESA hatama reseita $81,165 ba kofre Estadu ne’ebé rekolla husi fonte infratór sira hamutuk 125.
“Trimestre primeru to’o terseiru, ita halo ona inspesaun iha kapital no munisípiu sira totál estabelesimentu ne’ebé ita halo ona inspesaun ne’e hamutuk 1.881. Husi ne’e, hatama ona reseita ba kofre Estadu,” nia dehan.
Nia dehan, koima sira-ne’e hetan husi infratór sira-ne’ebé mak komete irregularidade ka infrasaun hamutuk 350.
“Atu hateten katak koima barak tebes kerdizer operadór ekonómiku sira seidauk halo tuir regra ne’ebé iha, tanba sira nafatin komete infrasaun. Maibé, ba tinan 2026 mai ne’e, ami hanoin koima sira-ne’e tenke redús pelemenus 75% ema entede hotu ona, ita bele foti reseita ne’ebé kiik,” nia hateten.
Nia haktuir, AIFAESA rekolla reseita ne’ebé mak mínimu signifika operadór ekonómiku sira intende ho di’ak ona hodi labele komete tan ona infrasaun irregularidade, atu nune’e produtu sira-ne’ebé mak tama Timor-Leste ne’e hotu hotu garantia kualidade.
Nia afirma, husi Janeiru to’o mai agora ne’e, AIFAESA halo inspesaun ba produtu ne’ebé halo apreensaun mak produtu aihan no mós la’ós aihan hamutuk 7.301, ba produtu ai-han hamutuk 7.200, alkól hamutuk 227 no tabaku 667.
Jornalista : Felicidade Ximenes
Editór : Cancio Ximenes
