MAPPF-FAO apoiu ekipamentu agríkola ba Sentru Ratahu Vikeke
VIKEKE, 15 Agostu 2025 (TATOLI)–Governu liuhusi Ministériu Agrikultura Peska, Pekuária no Floresta (MAPPF) no parseiru Food Agriculture Organization (FAO), Sesta ne’e, apoiu ekipamentu agríkola ba Sentru Ratahu, Suku Uma-Ua’in Kraik, Postu Vikeke Vila, Munisípiu Vikeke.
Iha distribuisaun ekipamentu ne’e, Ministru Agrikultura Peska, Pekuária no Floresta, Marcos da Cruz hateten ekipamentu ne’e husi MAPPF no FAO apoia Sentru Ratahu atu implementa atividade ortikultura, peska no hamoos duut.
“Ha’u husu xefe sentru tenke uza ekipamentu sira-ne’e ho di’ak inklui kareta carry ida no tratór boot ida. Liuhusi ekipamentu sira-ne’e atu ajuda sentru la’o bá-oin,” Ministru Marcos da Cruz hateten hafoin distribui ekipamentu agríkola iha Sentru Ratahu.
Ministru ne’e mós apela ba responsavel Sentru Ratahu atu utiliza ekipamentu referidu ho kuidadu nune’e dura ba tempu naruk.
Marcos husu traballadór husi ssentru ne’e tenke fahe tarefa servisu hodi hamoos duut sira-ne’ebé iha sentru laran, nune’e mós tau-matan karau, ortikultura, peska no pekuária.
Iha fatin hanesan, Prezidente Autoridade Munisipál Vikeke, Francisco C. S de Gonzaga Soares solisita Xefe Sentru Ratahu utiliza ekipamentu sira-ne’e ho responsabilidade no kontrola ekipamentu sira-ne’ebé Governu oferese ba sentru.
Iha biban hanesan, Xefe Sentru Ratahu, Agustinho C. S. Pinto dehan nia parte sei halo kontrolu ba ekipamentu sira-ne’ebé MAPPF no FAO oferese ba sentru.
“Bá-oin ha’u sei kontrolu ba ekipamentu sira-ne’ebé oferese mai iha sentru. Ekipamentu sira-ne’e ha’u sente sufisente ona ba ami hodi uza iha sentru. Atividade ne’ebé daudaun ami implementa mak hanesan ortikultura, pekuária, karau vaka sanulu no karau Timor 11,” nia tenik.
Tuir dadus, traballadór ne’ebé daudaun ativa servisu iha sentru Ratahu hamutuk na’in-17 inklui xefe sentru.
Entretantu, ekipamentu ne’ebé MAPPF hamutuk ho reprezentante FAO entrega hanesan mákina harahun duut, makína tesi duut, mákina dulas batar, mákina prodús pellet ba ikan no manu, mákina hois susu-been karau, jeradór boot no materiál agríkola sira seluk.
Ekipamentu husi FAO mak hanesan hand tratór ki’ik unidade haat, bidón rai batar lima, mákina behu batar unidade rua no mákina frijer multifunsaun rua.
Serimónia distribuisaun ekipamentu agríkola ne’e partisipa husi Sekretáriu Estadu Floresta, Sekretáriu Estadu Pekuária, Sekretáriu Estadu Peska, funsionáriu MAPPF no hetan partisipa husi autoridade lokál no komunidade.
Jornalista: Vitorino Lopez da Costa
Editór: Xisto Freitas da Piedade
