Orsamentu adisionál husi SEKoop atu sustenta Planu Asaun Anuál

DILI, 15 Agostu 2025 (TATOLI) – Sekretaria Estadu Kooperativa (SEKoop), iha reuniaun Komité Revizaun Orsamentu (KRO) 2026, husu adisionál hamutuk millaun $3,8 ba implementasaun programa-prioridade sira iha tinan oin.

Sekretáriu Estadu Kooperativa, Arsénio Pereira, hateten pakote fiskál ne’ebé Ministériu Finansa haruka ba SEKoop, iha valór hamutuk $2,492.492, ne’ebé fó prioridade ba saláriu no vensimentu no bens no serbisu, Nune’e, alokasaun ne’e la to’o atu sustenta ba Planu Asaun Anuál SEKoop ne’ebé Parlamentu Nasionál aprova ba tinan lima.

Nia salienta katak, adisionál ne’e importante atu kontinua programa sira hanesan produsaun Bafo Kayrala, promove produtu loka hanesan bani-been, masin, mina kamii no karau nia susu-been. “Aleinde ne’e, programa importante ida-ne’e ita sei halo iha tinan oin mak kona-ba ASEAN Cooperative Meeting, ne’ebé Timor-Leste mak sai uma-na’in”, Arsénio Pereira hateten iha Ministériu Finansa, ohin.

Iha verba adisionál ne’e SEKoop prevee ba transferénsia públika hamutuk millaun $1,8, atu fó apoiu ba movimentu kooperativa, grupu produtivu no asosiasaun produtór sira, no kustu operasionál ba Federasaun Kooperativa sira no seluk tan.

Ba kapitál menór aloka rihun $238, atu sosa ekipmentu informátika hodi fornese ba munisípiu no postu administrativu sira, projetór ba divulgasaun servisu SEKoop, formasaun no kapasitasaun ba kooperativa primária sira iha área remota, sosa tratór boot no hand tractor atu tulun atividade sira iha sentru kooperativa produsaun integradu.

“Karik adisionál ne’ebé ohin ami husu aprova mak tinan oin ami sei hetan orsamentu hamutuk millaun $6,3”, nia espera.

Relasiona ho ASEAN Cooperative Ministerial Meeting iha 2026 ne’em sei inklui programa hanesan ASEAN Cooperative Exp, no High-Level Discussion, ne’ebé sei partisipa husi membru kooperativa hotu iha rejiaun.

“Iha espozisaun ne’e, ita sei aprezenta ita-nia produtu kooperativa sira, tanba ba oin ita sai membru ASEAN, ita mós tenke iha produtu rasik para bele kompete. Ita bele hatudu katak ita-nia produtu sira ne’ebé prodús husi kooperativa sira no sira rasik mós lori sira-nia produtu mai aprezenta iha expo ne’e rasik”, nia dehan.

Kona-ba ezekusaun Orsamentu Jerál Estadu 2025 ba SEKoop, to’o agora ezekuta ona 60,25% husi alokasaun orsamentu hamutuk millaun $6-resin.

Jornalista: Arminda Fonseca 

Editora: Maria Auxiliadora