BAUKAU, 16 Agostu 2025 (TATOLI) – Primeiru-Ministru, Xanana Gusmão, lansa fatuk dahuluk ba konstrusaun eskema irrigasaun Modobuti, ne’ebé lokaliza iha aldeia Uatua, suku Gariuai, postu administrativu Baukau Vila.
Iha serimónia ne’e, Xefe Governu husu ba autoridade lokál hamutuk ho komunidade atu kontribui, liuliu ba joven sira atu serbisu tanba bainhira irrigasaun ne’e finaliza sei benefisia agrikultór sira.
“Ita husu atu kompañia serbisu ho di’ak no remata tempu”, Xanana hateten iha ámbitu lansamentu fatuk dahuluk, ohin.
Xefe Ezekutivu ne’e salienta katak Governu nafatin fó atensaun ba setór agríkola, hanesan kontrui irrigasaun hodi fornese bee ba natar sira tanba hakarak hasa’e produsaun hare iha rai-laran no hamenus produtu importadu.
“Ita presiza redús tiha importasaun hodi prodús fali saida de’it mak di’ak ba ita-nia rai rasik”, Xanana afirma.
Iha sorin seluk, Ministru Agrikultura, Pekúaria, Peska no Floresta (MAPPF), Marcos da Cruz, hateten investementu iha área agrikultura presizainfraestrutura bazika hanesan irrigasaun, maibé nesesita mós vontade husi agrikultór sira hodi hasa’e produsaun.
“Povu iha fatin ne’e kolabora tebes, liuliu xefe suku sira hamutuk ho veternu. Implementasaun projetu ida-ne’e halo tanba sira-nia apoia”, Marcos da Cruz hateten.
Projetu konstrusaun eskema irrigasaun Modobuti husi empreza internasionál China NucIear Industry-22 Construction CO.LTD ho númeru kontratu TENDER/027/MAPFF-2024 ne’ebé sei gasta orsamentu hamutuk millaun $22,6 ho durasaun serbisu tinan tolu.
Bainhira projetu ne’e finaliza mak sei fornese bee ba natar ektare 1.294, kompostu husi parte karuk iha ektare 699 no loos 595, ne’ebé sei benefisia komunidade suku ualu mak hanesan Gariuai, Uailili, Samalari, Builai, Buibau, Kaibada Makasa’e, Buruma no Seisál.
Fatin akumula bee ne’e sei utiliza área metru 200 ho kanál irrigasaun módulu portaun (bokadura) rua, kompostu husi kanál husi leste (parte loos) ho distánsia kilómetru 14.404 no oeste (karuk) ho distánsia kilómetru 18.192.
Jornalista : Natalino Belo
Editora : Maria Auxiliadora
