DILI, 17 Agostu 2025 (TATOLI)–Karketu Dili FC tama ona ba odamatan kampiaun Liga Futeból Timor-Leste (LFTL) ba époka 2025 hafoin empata ho Emanuel FC iha jogu jornada daualu, iha Estádiu Dili, Domingu ne’e.
Karketu Dili FC durante kompetisaun, seidauk iha ekipa adversária mak vense nia. Husi rezultadu ne’e, nia hetan pontu pozitivu, iha-ne’ebé lidera tabela klasifikasaun ho golu 20 iha jogu durante dala ualu ne’e.
Notísia relevante: Manán Assalam ho golu mihis, Karketu kandidatu forte ba kampiaun
Mezmu sei falta jogu ikus iha jornada dasiak kontra Coração FC, maibé Karketu serteja ona kampiaun LFTL, hafoin to’o jornada daualu rekolla pontu 20 bainhira empata ho Emanuel FC.
Ekipa Matak-Malirin durante epoka 2025, gaña vitória daneen (W) hanesan rekolla pontu husi ekipa sira hanesan FC Portu Taibessi, AS Marca, AD. SLB Laulara, CF Akadémika, Assalam FC no As Ponta Leste.
Enkuantu, jogu rua seluk empata (D) bainhira ekipa Matak-Malirin kontra Emanuel FC no iha jornada daneen empata ho DIT FC.
Husi rezultadu sira-ne’e hotu lori susesu ba ekipa Karketu Dili FC hodi sai kampiaun durante ezisténsia Liga Futebol Timorense hanesan iha tinan 2017, 2021, 2023, no 2025.
Entretantu, tabela klasifikasaun mós hatudu ekipa DIT FC, AD. SLB Laulara, CF Akadémika, Coração FC no As Ponta Leste sei esforsu atu hasees aan husi zona mean ba segunda divizaun iha jogu jornada ikus ne’ebé tuir planu sei hala’o iha semana-oin.
Jornalista: Natalino Belo
Editór: Xisto Freitas da Piedade
