DILI, 17 Agostu 2025 (TATOLI) – Embaixada Indonézia iha Timor-Leste hamutuk ho nia komunidade selebra Loron Independénsia Indonézia (17 Agostu 1945-17 Agostu 2025) ba da-80 iha Faról, Dili, ohin.
Ih selebrasaun ne’e, Embaixadór Indonézia iha Timor-Leste, Okto Dorinus Manik, fó apresiasaun ba sidadaun indonéziu ne’ebé hela iha Timor-Leste, tanba fó tempu hodi partisipa másima iha komemorasaun tinan 80 independénsia Indonézia nian.
“Ita-boot sira bele partisipa iha serimónia ida-ne’e ho roupa ne’ebé mai ho identidade oioin husi Nusantara nian. Komemorasaun tinan ida-ne’e di’ak tebes, furak no estraordinária. Ha’u hakarak fó apresiasaun no obrigadu ba ita hotu iha ne’e no husu atu tane ita-nia hamutuk, tau aas nafatin espirítu serbisu hamutuk”, Okto Dorinus hateten iha nia diskursu iha ámbitu komemorasaun loron 17 Agostu 1945.
Tema ba komemorasaun Loron Independénsia Indonézia mak “Bersatu, Berdaulat, Rakyat Sejahtera, Indonesia Maju”.
Diplomata Indonézia ne’e afirma katak tema ne’e reflete ba diskursu sira ne’ebé Prezidente Repúblika, Prabowo Subianto, hato’o ona iha plenária Parlamentu Indonézia nian iha loron hirak liubá, hodi husu ba entidade Indonézia oinsá halo nasaun ne’e sai soberna ba iha enerjia eletrisidade no ba iha ai-han, nune’e lori Indonézia sai nasaun ne’ebé dezenvolvida tuir meta katak Indonézia ouru iha 2045.
Okto mós hateten dezenvolvimentu Indonézia agora di’ak tebes no lalais, liuhusi programa sira ne’ebé iha hanesan indústria no investimentu.
Nia mós husu ba sidadaun Indonézia ne’ebé hela iha Timor-Leste atu ajuda hodi kontribui ba prosesu dezenvolvimentu ne’ebé la’o iha nasaun ne’e.
“Iha kontestu relasaun bilaterál entre Timor -Leste no Indonézia, to’o agora di’ak tebes”.
Nia afirma katak Indonézia sempre apoia Timor-Leste nia adezaun ba ASEAN iha fulan-Outubru tinan ne’e.
Iha sorin seluk, sidadaun Indonézia ne’ebé hela iha Timor-Leste, Maria Panjaitan, kontente hodi partisipa serimónia komemorasaun loron ne’e.
“Ohin ha’u mai tau roupa kultura Papua nian. Ha’u sente seguru hela iha Timor-Leste. No ha’u fiar katak kooperasaun entre Timor-Leste no Indonézia ba oin sai di’ak no forte liután”, nia afirma.
Jornalista: Natalino Costa
Editora: Maria Auxiliadora
