KOVALIMA, 18 Agostu 2025 (TATOLI) – Durante fulan hitu, Diresaun Servisu Terra Propriedade no Servisu Kadasterál (DSTPSK) arrekada no kontribui reseita rihun 38-resin ba kofre Estadu.
“Hahú Janeiru to’o Jullu ita rekolla ona reseita hamutuk $38,796.50 ba iha kofre Estadu. Nia fonte orsamentu mai husi arrendamentu bens no moveis eziste iha munisípiu Kovalima ne’ebé mak sidadaun sira okupa”, Diretór Diresaun Servisu Terra Propriedade no Servisu Kadastrál munisípiu Kovalima, Carlos Caitano relata dadus ne’e ba jornalista sira iha Bairru Rompe, ohin.
Reseita ne’ebé mak Diresaun Servisu Terra no Propriedade no Servisu Kadastrál munisípiu Kovalima kontribui mai husi sidadaun Kovalima-oan ne’ebé mak kada fulan selu ba Estadu hamutuk 468. Husi númeru ne’e, uza ba rezidénsia 376, komersiál 77, sede sia, torre Telemor rua, armazen ida-ne’ebé termina ona kontratu no fatin treinamentu Salele ne’ebé kontratu la ativu ona sira seluk ativu selu nune’e hodi kontribui reseita ba Estadu.
Arrendatáriu hamutuk 468, husi númeru ne’e sidadaun ne’ebé mak ativu selu hamutuk 165, la ativu selu hamutuk 210, tanba 93 husi transmigrasaun Salele hahú 2019 iha tempu Covid-19 la selu.
“Ba sidadaun ne’ebé mak durante la ativu selu ita fó ona notifikasaun nune’e sira bele selu dívida balun hahú husi 2017 no balun hahú 2019 to’o ohin loron. Balun mós ita fó segundu notifikasaun atu selu dívida, ne’ebé iha semana hirak liu ba fó sai tan notifikasaun ba ema na’in-lima” nia haktuir.
Razaun fó notifikasaun tanba sidadaun sira okupa bens no moveis Estadu molok atu okupa halo tiha kontratu arrendamentu ikus la kumpri fali sira-nia dever atu selu arendatáriu, tanba ne’e Terra Kovalima iha planu hodi halo levantamentu dadus iha área Salele.
Bazeia ba levantamentu dadus foun iha área transmigrasaun Salele hamutuk parsela 250 husi númeru proposta ne’ebé hetan ona aprovasaun arrendamentu 151, proposta foun submete ba Diresaun Jerál Terra no Propriedade 52 fó notifikasaun regulariza fatin 11 no notifikasaun atu selu arrenda hamutuk 28.
Aleinde ne’e mós dadus kontratu foun ne’ebé mak prosede ba Diresaun Jerál Terra no Propriedade (DGTP) totál 363. Husi númeru ne’e dadus kontratu foun uma Rumah Sangat Sederhan (RSS) sei prosesu hela hamutuk 61.
Jornalista :Celestina Teles
Editór:Rafael Ximenes de A. Belo
