KOVALIMA, 19 Agostu 2025 (TATOLI)- Komemoraaun loron Forças Armadas da Libertação Nacional de Timor-Leste (FALINTIL) ba dala-50 (20 Agostu 1975-20 Agostu 2025), Autoridade Munisipál Kovalima realiza marsa populár liuhusi isar bandeira nasionál.
Hodi konsidera katak, iha loron 20 fulan-agostu 2025, povu timoroan sei komemora Aniversáriu Forsa Armada Libertasaun Nasionál Timor-Leste (FALINTIL) nian ba dala 50, ne’e nu’udar oportunidade ida atu fó omenajen no hato’o agradesimentu ba kombatente sira hotu, liuliu ba martir sira ne’ebé sakrifika sira-nia vida hodi hetan liberdade no independénsia nasionál;
Haree ba importánsia atu fó onra ba loron 20 fulan-agostu nu’udar Loron FALINTIL nian, ne’ebé importante tebes atu rekoñese veteranu sira-nia valór ne’ebé boot tebes, sira-nia sakrifísiu no luta ba Timor-Leste nia independénsia, hodi fó onra ba sira-nia eroi sira no promove ideál sira-ne’ebé motiva sira-nia rezisténsia;
Hodi rekoñese katak, selebra loron 20 fulan-agostu nu’udar Loron FALINTIL, hanesan okaziaun exepsionál ida ba timoroan sira, liuliu foin-sa’e sira, atu selebra identidade nasionál no patriotizmu, nu’udar dalan ida atu prezerva no komemora memória luta nian no haburas konstrusaun Nasaun ida ne’ebé pasífika, tolerante no kriativa;
Konsidera katak, selebra Loron FALINTIL nian mós nu’udar oportunidade exelente ida atu halibur lider nasionál sira, autoridade sira seluk, komandante militár sira no sidadaun sira hotu, liuliu joven timoroan sira, hodi hamutuk fó onra ba eroi sira liberdade no independénsia nasionál nian, FALINTIL no Forsa Defeza Timor-Leste (F-FDTL).
“Ohin, ita hotu mai hamutuk iha ne’e, atu selebra tinan osan-mean FALINTIL. Aban FALINTIL halo tinan-50, 20 Agostu 1975 – 20 de Agostu 2025. Ho tinan ne’e karik ita bele fahe ba faze rua, faze dahuluk FALINTIL iha era rezisténsia libertasaun ba pátria no faze daruak mak FALINTIL iha faze defeza no dezenvolvimentu”, dehan Ministra Edukasaun, Dulce de Jesus, sai inspetora serimónia isar bandeira hodi komemora loron FALINTIL iha munisípiu Kovalima,ohin.
Iha 20 Agostu 2025, nia Governante ne’e dehan kuaze iha tinan 24, FALINTIL tama iha faze defeza hodi defende soberania Estadu nian husi ameasa estranjeira.
Nune’e, Governu da-sia liuhusi ME hala’o atividade balun atu lori no hakbesik estudante sira ho F-FDTL.
Iha fatin hanesan, Reprezentante Xefe Estadu Maiór FALINTIL-Forsa Defeza Timor-Leste (F-FDTL), Kolonél Helder da Costa, konsidera FALINTIL ho nia rezisténsia mak harii Estadu, dame hanesan misaun nasionál no internasionál no memoria responsavel edukasaun ba karater fó onra antesede.
“Ita trasa matadalan komemorasaun ida-ne’e ba dahuluk husi rezisténsia harii Estadu nune’e independénsia pontu finál, maibé inísiu husi esforsu koletivu ida dame ne’ebé dura ezije instituisaun inparsiál F-FDTL ho profisionál, besik ba sidadaun no besik ba justisa. Ha’u reafima ami nia kompromisu konstituisaun legalidade demokrásia”, Kolonél Helder da Costa, hatutan mensajen husi Tenente Jenerál Falur Rate Laek-nian
Iha ámbitu komemorasaun ne’e nia fó sai mós kompromisu konkretu orienta F-FDTL atu hala’o misaun ho asaun iha siklu foun, hanesan profisionalizmu no protidaun treinu fó kapasidade materiál lidera tuir padraun internasionál ajuda umanitária responde ba dezastre apoia ba protesaun sivil, étika no direitu umanu konsolidade doutrina no mekanismu formasaun ho prevensaun no responsabiliza asegura konduta impekavel husi pesoál militár hotu.
“Ita halibur malu la’ós de’it reflete pasadu komum atu hafoun aktu valór sira ne’ebé fó sentidu ita-nia prezente no traza ita-nia futuru hodi apela ba memória gratidaun no responsabilidade memória ba sira-ne’ebé luta hodi lakon sira-nia vida”, nia fó hanoin.
Jornalista :Celestina Teles
Editór:Florencio Miranda Ximenes
