Autoridade Ossú sei sosializa prevene balada husik livre
VIKEKE, 19 Agostu 2025 (TATOLI)—Autoridade Postu Administrativu Ossú, Munisípiu Vikeke iha tempu badak sei realiza sosializasaun kona-ba balada sira-ne’ebé husik livre iha Ossú.
“Antes ha’u seidauk asumi kna’ar ha’u rona ona Autoridade Munisípiu hasai ona karta sikulár hodi bandu balada sira labele husik livre. Nune’e, ba karta sirkulár ne’e ha’u sei tun hamutuk ho xefe suku sira sosializa karta sirkulár ba komunidade atu labele husik livre iha vila laran,” Administradór Postu Ossú, José da Silva Amaral ‘Radekiu’ hateten ba TATOLI iha Postu Ossú, Tersa ne’e.
José informa katak bainhira halo tiha sosializasaun mak komunidade sira kontinua husik livre balada hanesan karau, kuda, bibi no fahi, autoridade sira foti medida rigoroza oho balada sira-ne’ebé husik livre ne’e.
“Tanba animál kuandu husik livre ne’e ninia impaktu mak estraga kintal sira-ne’ebé besik uma hun sira. Tan ne’e, ami sei tau sériu ba animál livre sira atu labele estraga komunidade nia kintál,” nia hato’o.
Notísia relevante: Autoridade Vikeke lansa sirkulár bandu animál husik livre iha espasu públiku
Iha sorin seluk, abitante Ossú, Eurosio Soares Ruas preokupa kona-ba balada sira-ne’ebé husik livre tanba impaktu estraga ambiente komunidade nia uma ninin no planta sira.
“Ita haree ema autoridade sira aviza beibeik ba komunidade hodi sulan animál no bandu labele husik livre, maibé ita haree ita-nia komunidade sei menus konxiénsia hodi kontinua husik animál. Tan ne’e, ha’u husu autoridade sira kontinua fó-hanoin ba komunidade hodi sulan animál atu labele estraga ema-nia ambiente sira,” nia tenik.
Jornalista: Vitorino Lopez da Costa
Editór: Xisto Freitas da Piedade
