DILI, 19 Agostu 2025 (TATOLI)–Governu Timor-Leste liuhusi Gabinete Fronteira Terrestre no Marrítima (GFTM) hamutuk ho delegasaun husi Indonézia, Tersa ne’e, hahú negosiasaun fronteira marrítima.
Primeiru-Ministru (PM), Kay Rala Xanana Gusmão, hateten, nia prezensa iha atividade negosiasaun la’ós atu halo abertura maibé atu komprimenta delegasaun Indonézia ne’ebé Prezidente Repúblika Indonézia, Prabowo Subianto, haruka mai atu hahú formalmente negosiasaun.
“Buat ida-ne’e uluk kedas ami husu, maibé Indonézia kaer tuir lei internasionál dehan katak rai mak komanda tasi, maibé foin lalais Prezidente Repúblika Indonézia Prabowo simu pose ha’u hasoru nia iha nia pose, dehan ita bele komesa, ho ida-ne’e ohin hahú halo negosiasaun,” Xefe Governu hato’o iha Otél Palm Spring.
Nia dehan, ekipa sira husi Indonézia mai ho vontade atu partisipa ho laran di’ak tuir lei internasionál nian.
“Ida-ne’e atubele hetan buat ruma ne’ebé reforsa tan ita-nia amizade, ne’e duni ita hotu hein katak sira komesa ona diskusaun buat ne’e lalais, la kleur demais, la’ós aban bainrua kedas mais iha tempu ne’ebé oportunu sei di’ak tebes ba ita hotu,” nia akresenta.
Notisía relevante : Aban, Timor-Leste no Indonézia hahú negosiasaun fronteira marítima
PM relata, Governu Indonézia haruka ekipa boot ida mai iha Timor no sira atu hahú negosiasaun, ne’ebé Timor-Leste koko iha tinan barak liubá halo negosiasaun formál sira maibé Indonézia sempre hatete katak tuir lei internasionál rai maka komanda tasi.
“Ita bele hahú ona, maibé ha’u fó hanoin ba sira katak ita iha nafatin porsaun segmentu ida iha Oekusi no ha’u husu ba sira atu fó hanoin ba Governu katak ida ne’ebá ita tenke ramata. Maibe sim, Xefe Delegasaun ne’e iha ninia komentáriu hateten sira mai ho kompromisu tomak atu halo buat ruma tuir lei internasionál no ami dehan negosiasaun hanesan ne’e presiza fiar malu, respeitu malu no tanba ne’e mak ami fiar katak Indonézia komprometidu tebes atu rezolve problema marrítima,” Xanana Gusmão, reforsa.
Iha biban ne’e, jornalista sira husu karik negosiasaun ne’e parte ida atu halo serteza bilateral entre Indonézia no Timor-Leste molok Timor-Leste sai membru ofisiál ba ASEAN, nia parte hatan daudaun nia labele hateten asuntu ne’e.
“Ha’u hein nune’e, maibé ha’u labele dehan katak tanba ne’e la’ós fásil, ne’e la’ós halo liña de’it iha tasi-laran. Ne’e iha lei internasionál nia okos, sei lori tempu maibé ha’u fiar katak sei la ba tempu naruk tanba xefe delegasaun sira mai ne’e dehan ita iha ne’e, ita iha kompromisu atu servisu hamutuk,” Xefe Governu subliña.
Iha asuntu ida-ne’e, PM hateten daudaun seidauk bele hateten tenke iha solusaun maibé buat hotu sei la’o tuir lei internasionál. Tanba rezolve fronteira marrítima ne’e iha problema barak tebes maibé tenke konsidera rezolve tuir lei.
Bazeia ba informasaun ne’ebé Ajénsia TATOLI rekolla iha terrenu, katak iha inísiu negosiasaun fronteira marrítima entre Timor-Leste no Indonézia, delegasaun husi Indonesia hamutuk na’in-24, ne’ebé lidera husi Xefe Delegasaun, Laurentius Amrih Jinangkung.
Enkuantu husi Timor-Leste maka Xefe Delegasaun lidera husi Diretora-Ezekutiva Gabinete Fronteira Terrestre no Marrítima, Elizabeth Exposto no akompaña husi Embaixadór Timor-Leste ba Indonézia, Roberto Soares.
Tuir oráriu negosiasaun ba fronteira marrítima entre Timor-Leste no Indonézia hala’o durante loron-rua hahú 19 to’o 20 Agostu 2025.
Jornalista : Arminda Fonseca
Editora : Julia Chatarina
