DILI, 19 Agostu 2025 (TATOLI)—Reitór Universidade Nasconal Timor-Lorosa’e (UNTL), João Martins, hamutuk ho delegasaun Universidade Presbiteriana Mackenzie (UPM) Brazíl atualiza programa kona-ba atribuisaun sertifikadu ba benefisiáriu na’in-13 iha formasaun doutoramentu no UPM Brazíl rasik sei atribui grau doctor honoris causa ba Primeiru Ministru,Kay Rala Xanana Gusmão.
“Ami agradese ba Primeiru Ministru bele simu ekipa delegasaun husi Universidade Nacional Timor-Lorosa’e no mós Universidade Presbiteriana Mackenzie Brazíl, nune’e ohin loron ami mai ho ajenda rua hodi hato’o ba Primeiru Ministru. Ida, kona-ba ami-nia programa ba doutoramentu inter-institusionál ne’ebé ami servisu hamutuk ho Universidade Mekenzie,” Reitór Universidade Nasionál Timor-Lorosa’e, Joao Martins, informa ba jornalista sira iha Palásiu Governu, ohin.
Reitór UNTL ne’e hateten, grau dotoruramentu sei atribui husi Universidade Mackenzie Brazíl iha área literatura no lian portugés, maibé prosesu selesaun, orientasaun teze dekora hotu iha UNTL, entaun programa ne’e ho durasaun tinan rua ho balun ba kandidatu hamutuk na’in-13 ne’ebé kompostu husi dosente UNTL rasik.
Programa doutoramentu ne’e benefisiáriu sira hala’o formasaun estudu iha Timor-Leste, no formadór sira husi Universidade Mackenzie Brazíl maibé benefisiáriu sira tuir ezame kualifikasaun mak iha Universidade Mekenzie Brazíl iha tinan kotuk.
“Tanba ne’e, ami UNTL sente orgullu bele hola parte iha prosesu programa doutoramentu inte-institusionál ne’ebé fó mós esperénsia mai UNTL bainhira ba futuru bele loke tan programa doutoramentu. Entaun, ami iha ona esperénsia para jere programa ne’e rasik,” dirijente UNTL ne’e hateten.
Nia afirma, formasaun doutoramentu ida-ne’e tempu badak sei konklui ona no semana oin benefisiáriu sira-ne’e sei ba tuir ezame defeza públika desertasaun no iha loron 29 fulan Agostu sei realiza seremónia entrega diploma ba benefisiáriu sira.
Iha atividade ne’e mós sei marka prezensa direta husi Reitór Universidade Mackenzie rasik, tanba ne’e hein katak benefisiáriu na’in-13 ne’e bele pasa hotu hodi hetan sertifikadu.
“Programa ne’e di’ak tebe-tebes tanba ita poupa liu fundu duke ita gastu osan ba rai-li’ur, no mós Brazíl fó bolsu estudu liuhusi embaixada mak selu sira-nia propinas, benefisiáriu sira hein eskola de’it,” nia dehan.
Aleinde ne’e, iha ajenda daruak nian, sira husi disponibilidade husi Primeiru Ministru tanba Universidade Mekenzie estuda tiha ona perkursu iha área literária no poeta husi Primeiru Ministru rasik, eEntaun senadu Universidade Mackenzie estuda ona no deside atu fó grau doctor honoris causa ba Primeiru Ministru iha loron ne’ebé sei entrega sertifikadu ba benefisiáriu sira.
“Tanba ne’e, Primeiru Ministru kontente no simu grau ne’ebé universidade Mackenzie atribui ba. Tanba durante ne’e Primeiru Ministru simu grau barak husi nasaun seluk maibé ida-ne’e grau dahuluk ne’ebé nia hetan husi nasaun Brazíl,” nia dehan.
Jornalista : Alexandra da Costa
Editór : Cancio Ximenes
