KOVALIMA, 20 Agostu 2025 ( TATOLI)- Tékniku husi Diresaun Servisu Terra Propriedade no Servisu Kadasterál Munisípiu Kovalima halo ona reverifikasaun parsela 50 atu atribui sertifikadu na’in ba rai, iha suku Suai Loro,Postu administrativu Suai,Munisípiu Kovalima.
Programa liga ba atribuisaun sertifikadu na’in ba rai mak Nonu Governu Konstituisionál hala’o abertura iha Rejiaun Administrativa Espesiál Oekusi Ambenu (RAEOA) hafoin kontinua hala’o levantamentu iha territóriu.
“Faze dahuluk, ita hetan parsela 50, nune’e ita halo ona reverifikasaun iha terreñu inklui ho dokumentu hotu , tanba servisu husi nasionál ni’an dadus tomak konserva no konsentra iha nasionál iha planu husi Governu sentrál, ita partisipa no halo kolaborasaun hodi halo prosesu reverifikasaun iha terreñu iha suku Suai Loro. Nune’e bele hetan sertifikadu na’in ba rai ”, Diretór Diresaun Servisu Terra Propriedade no Servisu Kadasterál munisípiu Kovalima, Carlos Caetano ba TATOLI ,iha nia servisu fatin bairru rompe, ohin.
Dirijente ne’e esplika katak prosesu reverifikasaun iha kovalima hala’o iha fulan Juñu, nune’e ba sira ne’ebé seidauk kompleta rekezitu hanesan Billete Identidade (BI) no Kartaun Eleitorál (KI) halo ona koordenasaun ho lideransa komunitária sira no parte notariadu atu trata BI, nune’e atu submete dokumentu ba iha nasionál rejista iha sistema, nune’e bele hetan ona sira-nia direitu titulu na’in ba rai.
Bazeia ba planu husi diretór kadastru nasionál iha Sebembru sei hetan etapa segundu ni’an ba reverifikasaun nain ba rai, nune’e husi nasionál mak fornese dadus mai haree hodi identifika na’in hira mak sai benefisiáriu ba sertifikadu dadus. Nune’e terra sei halo koordenasaun servisu tau planu no halo preparasaun ba prosesu reverifkasaun dadus hodi atribui titulu na’in ba rai.
Jornalista :Celestina Teles
Editór:Florencio Miranda Ximenes
