FALINTIL menus rekursu maibé reziste nafatin luta ba ukun-aan
DILI, 20 Agostu 2025 (TATOLI)–Veteranu António da Costa Malu ‘Derok-Masin’ rekoñese Forsa Armada Libertasaun Nasionál Timor-Leste (FALINTIL) iha tempu luta menus rekursu tantu membru no ekipamentu funu maibé nafatin reziste luta tanba hakarak ukun-rasik aan.
Derok-Masin konta bainhira iha loron-28 Novembru 1975 Timor-Leste Proklama Independénsia Unilaterál iha 28 Novembru 1975, liu de’it semana-ida, loron-07 Dezembru, forsa Indonézia mobiliza kedas rekursu funu hodi invade Timor-Leste, iha-ne’ebé FALINTIL menus materiál funu nian no forsa la sufisiente atu responde forsa Indonézia nia invazaun.
“Ita hasoru inimigu tuir kondisaun de’it, tanba ho polítika hakarak ukun-aan, maibé tuir ita-nia predisaun atu impede materiál funu barak ne’e susar. Ita só halo de’it meiu balun destori batallaun Indonézia hodi hadau kilat,” Derok-Masin informa ba TATOLI liuhosi telefónema, Kuarta ne’e.
Notísia relevante: Komemorasaun loron FALINTIL tinan-ne’e hala’o iha Tasi-Tolu
Eis líder Konsellu Nasionál Rezisténsia Timorense (CNRT-sigla portugeza) iha Munisípiu Baukau ne’e relata katak hafoin forsa Indonézia to’o iha Dili, liu loron tolu, madrugada loron-10 Dezembru, forsa Indonézia batallaun atus-resin tun iha Aeroportu Lanud Baukau liuhosi prakedista ho ekipamentu karru-asaltu inklui materiál funu nian seluk tan.
Enkuantu, nia haktuir, Forsa FALINTIL iha Baukau iha de’it pelutaun tolu, iha-ne’ebé kada pelutaun membru na’in-30, mezmu nune’e konsege atake forsa Indonézia maibé tenke retira aan ba ai-laran tanba hetan orientasaun husi Komandu Luta nian.
“Kondisaun difísil ne’ebé hasoru mak FALINTIL laiha kilat-musan no kilat balun aat,” Derok-Masin akresenta.
Eis Segundu Komandante Kompañia FALINTIL 114 ne’e informa durante reziste hasoru Indonézia, organiza asaltu hasoru inimigu, tanba hakarak hadau kilat hodi haforsa matérial funu FALINTIL tanba menus arma.
Maski FALINTIL laiha ekipamentu funu no forsa FALINTIL ne’ebé limitadu, maibé nafatin iha espíritu hodi kontinua luta, tanba ho prinsípiu la haree ba totál inimigu maibé prioridade mak hadau Komandu liuhosi estratejia halo imbuskada hasoru forsa Indonézia.
“Hau-nia rekomendasaun mak ne’e, Timor-Leste nasaun ki’ik, ita-nia matérial funu sei limitadu, entaun importante mak ita tau aan neutru, iha klaran, buka amigu,” Derok-Masin rekomenda.
Jornalista: Natalino Belo
Editór: Xisto Freitas da Piedade
