Komemora loron FALINTIL, PNTL Vikeke husu abitante sira hametin dame
VIKEKE, 20 Agostu 2025 (TATOLI)–Komemorasaun loron Forsa Armada Libertasaun Nasionál Timor-Leste (FALINTIL) ba dala-50 (20 Agostu 1975-20 Agostu 2025), Komandante Polísia Nasionál Timor-Leste (PNTL) Munisípiu Vikeke, Superintendente Polísia António do Rego Fernandes husu abitante sira iha Munisípiu Vikeke hametin dame.
“Ohin ita selebra loron FALINTIL ba dala-50 hodi ita reflete filafali tinan 50 ba kotuk katak dame ne’e maihusi konflitu no bainhira konflitu laiha, dame mós laiha. Tanba ne’e, dame no konflitu sempre junta malu. Tinan 50 liubá ne’e ita iha konflitu. Selebrasaun iha tinan ne’e ita presiza dame ho ema seluk, nune’e mós ita tenke hametin ita-nia pás iha Munisípiu Vikeke,” António hateten ba jornalista sira iha Postu Vikeke Vila, Kuarta ne’e.
Notísia relevante: Lentil: FALINTIL nia misaun mak liberta povu no nasaun
Komandante PNTL Munisípiu Vikeke ne’e dehan esénsia husi loron FALINTIL ne’e la’ós selebra de’it, maibé foinsa’e sira tenke aprende no aprende nafatin hodi substitui jerasaun tuan sira.
“Tanba ne’e, selebrasaun ida-ne’e ba joventude tenke estuda no estuda hodi lori nasaun ne’e bá-oin,” nia hato’o.
Jornalista: Vitorino Lopez da Costa
Editór: Xisto Freitas da Piedade
