Komunidade Afaloikai normaliza estrada ligasaun Asamuta no Dasu-Uati
VIKEKE, 20 Agostu 2025 (TATOLI)–Komunidade husi Suku Afalokai, Postu Administrativu Uatulari, Munisípiu Vikeke ho inisiativa rasik normaliza estrada ko’ak sira hahú husi Asamuta, Aldeia Liaside, Suku Babulo liga bá Aldeia Dasu-Uati foho, Suku Afaloikai.
Xefe Suku Afalokai, Cesário N. Pires haktuir komunidade halo serbisu ne’e ho voluntáriu atu transporte sira bele asesu.
“Ita-nia estrada ne’ebé liga bá aldeia sira iha foho ne’e kondisaun grave, liuliu iha tempu udan karreta sira labele asesu to’o iha foho. Tanba ne’e mak komunidade, autoridade lokál no veteranu sira deside hadi’a estrada sira-ne’e atu transporte sira bele asesu,” Cesário hateten iha Postu Uatulari, Kuarta ne’e.
Xefe Suku hatutan intensaun seluk husi hadi’a estrada referida atu empreza bele hatama poste (ai-riin) eletrisidade no materiál konstrusaun edifísiu eskola ida iha Aldeia Ossokaiua.
“Estrada ne’e difikulta empreza lori ai-riin eletrisidade no materiál konstrusaun edifísiu eskola. Tan ne’e mak ita-nia komunidade ateru estrada ko’ak sira-ne’e ho rai no fatuk hodi fasilita transporte sira bele lori materiál ba fatin konstrusaun,” Cesário informa.
Ho kondisaun estrada ne’e, Autoridade Afaloika ne’e husu Governu hadi’a estrada sira-ne’ebé aat hodi fasilita komunidade ne’ebé hela iha área rurál.
Jornalista: Vitorino Lopez da Costa
Editór: Xisto Freitas da Piedade
