SMSA Kovalima halo inspesaun ba hahan iha restaurante 18
KOVALIMA, 20 Agostu 2025 ( TATOLI)- Servisu Munisipál Seguransa Alimentár ( SMSA) hala’o ona inspensaun no monitorizasaun ba hahan iha restaurante hamutuk 18, iha postu administrativu Tilomar, Zumalai no Suai , munisípiu Kovalima.
“Ita halo inspensaun no monitorizasaun ba restaurante 18 iha munisípiu Kovalima atu haree kondisaun hahan nune’e konsumidór sira han ai -han ne’ebé mak ho ijiene”, dehan Diretór Servisu Munisipál Seguransa Alimentár, Hilario Oliveira ba TATOLI, iha Bairru Kosta ohin.
Ekipa halo monitorizasaun ba restaurante 18, husi númeru ne’e restaurante iha postu Zumalai rua, Tilomar ida, restaurante iha postu Suai 15. Objetivu halo monitorizasaun ne’e atu garante konsumidór han ho hahan kualidade nune’e di’ak ba ema nia saúde
Rezultadu monitorizasaun husi SMSA identifika restaurante ida mak deside taka provizóriu hodi halo rekomendasaun atu hadi’a kondisaun ijiene, hafoin loke hikas fali.
“ Ami hala’o monitorizasaun atu haree kondisaun restaunte bainhira iha monitorizasaun restaurante laiha ijiene ekipa taka provizóriu hodi fó tempu semana ida atu taka, nune’e sira bele hadia kondisaun ,” nia afirma.
Dirijente ne’e dehan, loke restaurante la’os atu buka de’it lukru, maibé presiza atu kria kondisaun ne’ebé ijiene, nune’e labele fó impaktu ba ema nia saúde
“ Ami ba haree sira-nia fatin hodi halo rekomendasaun atu hadia tiha fatin koziña bainhira ita ofrese hahan la’o buka lukru de’it maibé presiza kria kondisaun “ nia dehan.
Jornalista :Celestina Teles
Editór: Florencio Miranda Ximenes
