DILI, 20 Agostu 2025 (TATOLI)—Forsa Espesiál Austrália, Peter Reed, prefere joven timoroan sira bele aprende maka’as hodi tane eroi sira-nia dedikasaun iha luta libertasaun Timor-Leste.
Veteranu australianu hato’o asuntu ne’e, iha ámbitu komemorasaun tinan 50 ezisténsia Forsa Armada Libertasaun Nasionál Timor-Leste (FALINTIL), hahú 20 Agostu 1975 to’o 20 Agostu 2025.
“Ha’u hanoin joven tenke estuda maka’as, aprende buat barak no iha respeitu. Entaun ida-ne’e sei hatudu domin ba an rasik, respeitu ba nasaun no FALINTIL tomak,” Peter Reed hato’o ba jornalista sira, iha Tasi-tolu, Kuarta ne’e.
Nia konsidera, joven sira mak sai kontinuadór ba nasaun demokrátiku ne’e. Tanba ne’e, presiza aprende iha setór hotu atu kontribui ba dezenvolvimentu nasionál.
“Ba jerasaun foin-sa’e sira ohin loron, se sira hatudu orgullu ne’ebé ha’u haree iha ne’e, ohin ha’u hanoin laiha ema ida maka bele la’o sala,” nia akresenta.
Notísia relevante : Vise PM Assanami husu joven kontinua luta tuir prinsípiu FALINTIL
Peter Reed, haktuir, nia viajen dahuluk mai Timor iha tinan 2000 no filafali mai Timor iha tinan 2022.
“Ha’u mai Timor iha tinan ne’e hanesan ha’u-nia viajen datoluk. Kada viajen ha’u sempre haree progresu husi soldadu sira no nasaun tomak. Nune’e, ha’u hanoin ohin loron ne’e hanesan loron ida-ne’ebé di’ak tebes atu haree oinsá povu Timor-Leste sente orgullu hodi selebra marku importante ida hanesan ne’e,” Peter Reed, tenik.
Jornalista : Osória Marques
Editora : Julia Chatarina
