DILI, 20 Agostu 2025 (TATOLI)–Vise Primeiru-Ministru, Ministru Koordenadór Asuntu Sosiál, no Ministru Dezenvolvimentu Rurál no Abitasaun Komunitária, Mariano Assanami Sabino, ezije empreza responsável ba konstrusaun uma dignu iha munisípiu Manufahi, Manatutu, Bobonaru no Lautein tenke hatudu serbisu no kualidade di’ak.
“Progresu implementasaun uma dignu hamutuk 90 ne’ebé Governu halo ona balun atinje ona 80%, 90% no balun 30%, maibé ida-ne’e Governu nafatin halo monitorizasaun no husu ba empreza lokál sira tenke esforsu-an halo didi’ak hodi garante uma-nia kualidade,” Vise PM Assanami hato’o iha salaun Ministériu Negósiu Estranjeiru no Kooperasaun (MNEK), Praia dos Coqueiros, Kuarta ne’e.
Nia dehan, loloos Governu halo uma dignu unidade 90, maibé Ministériu Dezenvolvimentu Rurál no Abitasaun Komunitária responsável apoiu konstrusaun balun hanesan kafetaria no sintina públiku.
“Nune’e, konta hamutuk uma 136, orsamentu ba ida-ne’e ita halo retensaun ba tinan 2024. Ba tinan ne’e ita planu atu halo tan uma dignu bele 50 to’o 60 maibé orsamentu la liu $50.000,” Assanami, akresenta.
Notísia relevante : Prezidente Ramos-Horta konstrui uma dignu ba família rua iha Lourba-Atsabe
Governante ne’e konsidera, uma la’ós de’it nesesidade povu maibé direitu ida iha Konstituisaun. Tanba ne’e, Governu sei esforsu nafatin halo uma dignu, depoiz maka utiliza ba karater diferente, balun karater ho sosiál, balun karater kréditu no seluk tan maibé uma tenke hanesan.
Ministériu Dezenvolvimentu Rurál no Abitasaun Komunitária iha planu iha tinan oin sei harii uma dignu hamutuk 1.300.
“Maibé ida-ne’e loke konkursu públiku ba empreza internasionál sira partisipa. Uma la’ós de’it nesesidade povu, maibé direitu ida iha Konstituisaun, tanba ne’e Governu sei esforsu nafatin halo uma dignu,” nia katak.
Tuir planu, tinan oin sei implementa kada munisípiu uma hamutuk 300 no orsamentu ba uma 1.300 ne’e hamutuk millaun $50-resin.
Iha tinan 2024 harii uluk uma hamutuk 90, iha Tunu-Bibi-Maliana 25, Fatuberliu 25, Natarbora 25 no Muapitini-Lautein 15.
Governu halo uma dignu ho nia medida 9×12, ne’ebé kada uma ho kustu $45.000. Tanba ne’e totál osan ba konstrusaun uma 90 iha faze dahuluk hamutuk $4.050.000.
Jornalista : Arminda Fonseca
Editora : Julia Chatarina
