KOVALIMA, 21 Agostu 2025 ( TATOLI)-Diretóra Servisu Munisipál Edukasaun Kovalima,Elda de Fátima hateten, daudaun ne’e, identifika eskola balun te’in hahán ba estudante sira la tuir menu hosi programa merenda eskolár nian ne’ebé maka governu liuhosi Ministériu edukasaun aprova ona antes ne’e.
“Ha’u hakarak fó hanoin ba Ekipa jestaun programa (EJP) Merenda eskolár tein tenke tuir menu PME, iha eskola balun ami identifika ona, te’in la tuir menu PME, tanba ne’e, ha’u sei troka sira bainhira fiskalizasaun hato’o relatóriu mai iha ha’u,” Nia hateten ba TATOLI, iha Santa Rosa, ohin.
Maibé, Diretóra ne’e seidauk bele públika lista naran hosi eskola hirak ne’ebé viola menu programa merenda eskolár ne’e ba iha públiku tanba oras ne’e ekipa husi Servisu Munisipál edukasaun sei kontinua verifika dadus iha terenu.
Nia reforsa bainhira identifika pesoál sira ne’ebé maka te’in hahán ba estudante sira la tuir menu maka Servisu Munisipál Edukasaun Kovalima sei hapara pesoál hirak ne’e hodi troka ema seluk.
“Bazeia menu implementasaun programa merenda eskolár hanesan iha loron segunda fó han alunu etu,naan,modo ai fuan no temperus, loron tersa forñese etu, manu tolun,modo ai-fuan no temperus, kuarta, batar koto, tahu,modo ai fuan no temperus, kinta, etu, naan, modo ai-fuan, sesta forñes etu, manu tolu, modo, ai-fuan no temperus.
Orsamentu ba programa merenda eskola tinan 2025 nian ne’ebé aloka ba munisípiu Kovalima hamutuk $1,165,367.68 hosi montante ne’e, aloka ba eskola pre-eskolár $110,520 no eskola ensinu báziku $ 1,378.029.
Iha biban seluk, Diretór Servisu Munisipál Seguransa Alimentár, Hilario Oliveira dehan, informa hosi rezultadu monitorizasaun ba implementasaun programa merenda eskola iha munisípiu ne’e la’o di’ak maske eskola balun implementa la tuir menu ne’ebé makai ha ona.
“Ita haree implementasaun ba programa la’o tuir menu, tanba bainhira ba terreñu hodi halo monitorizasaun ita haree uluk mak menu ba ohin loron no sira prepara ai-han saida, ba alunu sira atu han,”nia dehan.
Jornalista :Celestina Teles
Editór:Florencio Miranda Ximenes
