BOBONARU, 21 Agostu 2025 (TATOLI)—Negosiante sira iha Kinta ne’e hahú sobu totál ona baraka no kioske tanba ekipamentu pezadu husi Institutu Jestaun Ekipamentu Apoiu Dezenvolvimentu Infraestrura, Institutu Públiku (IGEADI, I.P.) Brigada Maria-Tapó iha ona terrenu no preparadu ona atu ateru rai hodi haluan espasu merkadu lokál Ili-bole.
Negosiante husi Suku Oe-leu, Maria Morais deklara sira deside sobu rasik baraka tanba koopera ho desizaun Governu.
“Foin lais ne’e balun sobu no balun la sobu maibé agora mákina mai ona entaun ami tenke sobu, tanba Governu atu halo fatin ne’e luan fó ami para ami bele fa’an sasán. Ami presiza lalais. Se la’e udan mai atu fa’an iha ne’ebé,” nia informa ba TATOLI iha merkadu Ili-bole.
Notísia relevante: Negosiante balun ho konxiénsia sobu rasik ona baraka iha merkadu Ili-bole
Aleinde ne’e, abitante Bobonaru, Delfin Pereira agradese ba Governu no konsidera interversaun ne’e aleinde haluan espasu merkadu, prevene mós engarrafamentu iha futuru.
“Ita apoia desizaun Governu tanba fatin merkadu ne’e loloos iha kotuk más ita-nia negosiante sira okupa fali mai estrada, entaun loron-loron sempre engarrafadu. Kareta ho motór para arbiru, ema la’o ladi’ak, satan tempu finadu, natál no tinan foun ne’e movimentu maka’as. Ita liu ladi’ak tan dalan kloot. Agora dudu ona ne’e ha’u sente luan ona,” nia haktuir.
Enkuantu, Autoridade Munisipál Bobonaru fó notifikasaun katak hahú husi 21 Jullu to’o 30 Agustu 2025 ne’e merkadu tenke muda ba kotuk tanba konsiderada atividade negósiu iha fatin referida okupa espasu públiku no futuru sei afeta ba alargamentu estrada diresaun kapitál Maliana vila bá Postu Administrativu Bobonaru no Lolotoe.
Notifikasaun ne’e bazeia ba Dekretu-lei númeru 33/2008, 27 Agostu, artigu 4 númeru 3 kona-ba atividade komersiál labele taka estrada públiku no trotoár sira.
Negosiante sira-ne’ebé daudaun ne’e negósiu iha merdu ne’e kuaze 20-resin mai husi Suku Oe-leu, Postu Administrativu Bobonaru no Suku Odomau ho Suku Raifun, Postu Administrativu Maliana.
Jornalista: Sergio da Cruz
Editór: Xisto Freitas da Piedade
